“ضرب الأبناء ” .. بقلم الكاتبة إيمان عبيد


ضرب_الابناء

ضرب الابناء مش حل لتغير سلوكهم
حتي لو انتو كأباء شايفين انه بيجيب نتيجه وان الطفل انتهي عن تصرف معين بعد ما عاقبتوه بالضرب فهو للاسف انتهي بشكل مؤقت
انتهي قصادكو بس عشان خايف منكو لكن لسه قناعته ومخه نفسهم يمارسو نفس الفعل تاني ببساطه لانه مفهمش هو ليه غلط و ايه السر من منعه
والنتيجه انه هيطلع ١يااما شخصيه عدوانيه نتيجة العنف اللي اتعرضله منكوا ٢يااما كدب ومع اقرب فرصه هيكون فيها بعيد عن عنيكو هيمارس نفس التصرف ويخبي عنكو ومش هتعرفو طبعا
وبدل ما كان تصرف واحد سئ بقوا اكتر من تصرف وصفه سيئه
٣_ يااما شخصيه ضعيفه وهشه وفاقد الثقه في نفسه وفي تصرفاته وفي اللي حواليه نتيجه للخوف اللي اتعرضله في كل مره ضربتوه فيها
؛؛؛احذفوا الضرب من قاموس التعامل مع الابناء نهائيا لو عايزين تعلمو ولادكو الصح من الغلط فيه وسائل تانيه اصح وافضل في النتيجه
وسائل هتقدرو من خلالها تزرعو فيهم قناعات ومبادئ كويسه
هتخليهم يمارسو التصرفات اللي انتو عايزينها عن اقتناع منهم لنفسهم لانهم حابينها مش لانهم خايفين منكو
خلو ولادكو يسمعو كلامكو حبا فيكو واحتراما ليكو مش خوفا منكو خلوهم يسمعوا الكلام لانهم مقتنعين مش لانهم خايفين
ببساطه صاحبوهم اتكلمو معاهم بلاش لغة الامر لان الطفل عنيد بيحب يحس انه بيختار مش بيتأمر
ممكن تكلموهم عن الحاجه اللي نفسكو يعملها وعن نتايجها الكويسه لحد ما هو بنفسه يختارها
وتكلموه عن العاده السيئه اللي عايزينه يبطلها وعن عواقبها لحد ما هو بنفسه يكرهها
اصنعو لغة حوار بينكو وبينهم يناسب عقلهم وسنهم
انزلو بعقلكو لعقلهم واتحاورو معاهم باسلوبهم كأنكو من سنهم
لو عمل تصرف سئ لاول مره بلاش عقاب اتعاملو باسلوب النصح والتوجيه كلموه عن اضرار التصرف ده وعن مميزات التصرف الافضل
لو كررالغلطه للمره التانيه العقاب ميكونش بالضرب برضو ممكن تبينو انكو زعلانين منه ومخاصمينه لحد ما يجي يعتذر ويفهم غلطه
واعتقد لو انتو مصاحبينه من البدايه وبتقدموله الدعم اللي هو محتاجه زعلكو هيفرق معاه ومش هيكررها بعد كده ابدا
ولو حصل و كررها للمره التالته برضو العقاب ميكونش ضرب ممكن يكون حرمان من حاجه بيحبها
لحد ما يحس بحجم الغلطه ويجي يعتذر ويغيرها

استخدمو اسلوب التحفيز من البدايه بدل اسلوب الترهيب

يعني بدل ما تخوفوه من اللي هيحصله لو عمل التصرف السئ حببوه في التصرف الاخر الكويس وكافئوه كل ما يعمله

شجعوه بإن في كل مره هيعمل فيها الصح هيبقاله مكافأه

وافتكرو ان ولادكو هيتعلمو من تصرفاتكو وافعالكو اضعاف اللي هيتعلموه من الاوامر والنصايح
الطفل بيتعلم بعينه اكتر
يعني #لو انتو مثلا بتنصحوه بترتيب ألعابه او كتبه وهو شايفكو غير مرتبين قصاده عمره ما هيتعلم الترتيب لانه بيلقط ويتعلم من طباعكو مش من كلامكو

لو مثلا عايزين تعلموه الصدق وانتو بتمارسو الكدب قصاده عمره ما هيطلع انسان صادق

وهكذا مع اي صفه او عاده عايزين تزرعوها فيه
مارسوها قصاده بلاش تنصحوه بحاجه وتعملو العكس
لان كده #اولا مش هيتعلم ولا هيسمع الكلام #ثانيا هتحصله اضرابات كتير في شخصيته نتيجه للتناقضات اللي هو بيواجهها بين كلامكو وتصرفاتكو
انتوا موجودين في حياتهم عشان تكونو مصدر حمايه ليهم مش مصدر أذي جسدي ونفسي
بلاش تطلعو مشاكلكو وضغوطكو اليوميه عليهم الافضل تواجهو مشاكلكو وتحلوها بدل ما تطلعوها ع الكائنات الضعيفه اللي مسؤله منكو عشان متشيلوش ذنبهم
انتو هتتسألو عنهم وهتتحاسبو عليهم

خليكو شخصيات سهلة التعامل معامهم مش شخصيات صعبه عشان متكونوش مصدر ضغط عصبي ليهم

اكسبوا ثقتهم واحتوهم عشان ميطلعوش يبحثوا عن الاحتواء ده برا وساعتها تدخلوا في مشاكل من نوع تاني كنتو في غني عنها من البدايه

اعرفوا عواقب اللمسه والكلمه قبل ما تطلع منكوا بلاش ايديكو ولسانكو يكونو سابقين عقلكوا

اهتمو بولادكو وافتكرو ان اللي هتزعوه فيهم النهارده هو اللي هتحصدوه منهم بعد سنين

لو زرعتوا قسوه هتاخدو قسوه ولو زرعتو محبه هتاخدو محبه
لو زرعتو فيهم حب الخير من صغرهم انتو اول ناس هتاخده منهم ولو زرعتو الشر مش هتحصدوا غيره

ايمان_عبيد

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.