وقت المطر
ادعي
“يارب خدني للي سكنوا الارض
واتلحفوا بالهوا السقعان
يارب حلمك حبه ع الجدعان
والي اتسجن ف الحبس
والي اتسجن ف الريح”
وقت المطر يارب
ساعدني ع التسبيح
وانا
مليت مقامي جوا هذا البيت
خايف اشق الارض
يطلع فقير م الطين
متغطي م الامطار
يارب لطفك برضوا بالثوار
وارحم خطايا اذ انا ضليت
وارزقني وحدة هذا القمر ف الكون
عريان ف عز الضلمة يطرح نور
غلبان مخندق تحت هذا السور
نايم ف عز السيل
يحلم ببيت بلور
والدنيا تضحك والجبين مسرور
وارزقني ضحكة منها وسلام
وارزقها فيا زحمة بشر وكلام
لاجل تغير جلدي لو ملت
واحكيلها قصة حتي لو اوهام
واحشرني وسط المنبوذين
والمطرودين ف الارض
وانزع بقلبي حب الكلام والسرد
ان كنت يوم اكذب او اقول للناس
حب الحياة م الفرض
او كنت باشبه فيا هذا الخوف
يارب مطرة م الهدوم والصوف
تحمي جسد هذا الفقير ف البرد
وارزقني حب المعرفة لكن
بلاش تخلي نتاجها هو الطرد
خليني تافه اذا شاء الرئيس
والشرطة والشيطان
اهون لساني يتقطع م الخوف
من كون دمايا تغرق الاوطان
يارب اشهد
اني ضعيف
وجبان
#يارب
#شظايا
