يا حروف العالم ….الكاتبة إيمان الوكيل

ياحروف العالم
اتجمعوا
واكتبوا أسم الحبايب اللي
اتفرقوا
واحكوا عني حكاويهم
وانقلوها ل بنيكم
ووصوهم يحكوا لاولادهم
الحلو والمحزن ع السواء
فيها العبرة والضحكات
ويضحكو ع زمن فات
اللي راح واللي مات
واتغيرت الصفات
أحكوا عن الجدات
تقاليدهم والعادات
شوار العروسة
وزفة العريس
احكوا حتى عن الانجليز
ونابليون ولويس
احكوا عن حب بقى عزيز
يا آلة الزمن انسيني
هبقى هناك ما ترجعيني
وقولي للساعة توقف ماتدق
اصحى ع ريحة الحطب ف الفرن
والعيش الفلاحي السخن
واللمة جنب الراكية والكلام ع القطن
والري والنيل بيصب
والعمة لما تنادي وتقول
ست الحلوين تطل
وانا اضحك واترمي ف الحضن
كان ع ضيقة وضمته
وِسع الدنيا .. ك الأم
ياه يا ذكريات عن اللي راح
واللي فات
جيتي ليه بالعبرات
دي الدنيا مش ناقصة … دمعات