دلقت ماء الحلم
على بيوت اللى راحوا بدون رجعه
وقولت امشي لوحدي خفيف
لقيت الصفعه تتلو الصفعة
والواقع قايم ع التجريف
فردمت بذور الشوق فيا
وحصدت رحيل
واما نذير النور جاني
صبحت كفيف
وقولت اكيد الموت لسه
منسجش خيوطه على كتافي
انا لسه الشيب مغزلش الراس
ولا سنى عجوز
ولا كنت باعوز جنة وملكوت
غير بس القوت
وبيبان وبيوت
تحضن احلامى المتقادة
من حس صراخى وهتافي
وازعق في الموت علشان يرحل
ولكنه عنيد
بيكسر صوتى المتكتف
وبيطفي اللمعة اللى ف عيني اول م تقيد
واقوله استنى اموت بكرة
وخليني الليلة اغزل حلمى
فيكتف خطواتى الجارية
ويوقع حلمى مع العناقيد
وارضخ للموت فاموت طمعان
واقوله يارب انا جيت ندمان
فارزقني الجنة واحلامها
فالاقي النار بتزغرد شوق
وجيانى وبيسيبو لجامها
وتقوله يارب ده من حقي
والجنة حرام على كل شيطان
فاهرب علشان خايف مرعوب
فالاقي طيور بتحدف طوب
وبترجم جسمي المتكتف
في الشاش الابيض والاكفان
فاقوله يارب ارحم ضعفى
رجعنى الدنيا وزيدنى ايمان
فارجع على صوت أنفاس الكون
لما بتتنفس كل صباح
فاقول هارجع بكرة لنفسي
الاقيني ف اخر الليل برضو
ماشي في طريق نحو الخسران
محمد خالد
