يوميات عائلة مثالية
اسكتشات تمثيلية
الفكرة العامة:
اسكتشات تمثيلية ترفيهية ساخرة عن الأوضاع الحالية في الأسر المصرية.
الحلقة (1) مكرونة بشاميل..
- الزوج يقف في المطبخ مرتديا المريلة وعلى رأسه قبعة طباخ كبيرة ليصنع لهم ((أحسن مكرونة بشاميل في الدنيا)) ، يضع الكمامة ثم يرفع يديه لأعلى كطبيب مقبل على عملية جراحية دقيقة، بجانبه عدد كبير من البيض و”صفيحة” سمن وجوال دقيق ، يضع المقادير بشكل مبالغ فيه ، ومن حوله بقايا دقيق في كل مكان..
- الزوج: – انا هدوقكم اللى عمركم ما دقتوه ..
- الزوجة:- يا سيدي خلصتلنا خزين الشهر كله ..
- الزوج: يعني الحق عليا اني بساعدك!
- الزوجة: هي دي المساعدة..؟ انت ليه محسسني إنها آخر صينية مكرونة بشاميل هتشوفها البشرية..!
- الزوج: – اش فهمك انتي ، الحاجة لازم تتخدم علشان تطلع زي ما أمي كانت بتعملهالي،
- يقول بصوت آمر: “لبن” ،
- تدخل الزوجة وتسحب خلفها بقرة ..
- الزوج: هو أنا مش شاريها بقالي أسبوع وجبت لك نص فدان برسيم ، علشان تحلبيها وتحضريلي لبنها الطازة النهاردة.
- الزوجة: معلش يا حبيبي ما انت عارف من ساعة ما شرفت بسلامتها وكل يوم احنا في خناقة شكل مع الجيران علشان صوتها الجميل اللى بيخرق الحظر وبيطلع مع طلوع الفجر.
- الزوج: طب خلاص خلاص اسحبيها من هنا ، أنا عامل حسابي وكنت عارف انك مش هتسعفيني.
- يتجه للثلاجة ويخرج “جيركن” لبن. ثم يقول لابنته:
- – هاتي يا نيمو شوال الدقيق ده ..
- تحاول البنت زحزحته بصعوبة حتى تصل للأب.
- الزوج: يلا اطلعوا وسيبوني أبدّع..
- يرقص على أغنية مفيش حاجة تيجي كده ، ثم ينتبه ويقول:
- – لا أنا حاسس ان رجولتي بتتسحب مني في المطبخ،
- يغلق أغنية نانسي ويسمع أغنية
- ((أنا مش بتاعة الكلام ده أنا كنت طول عمري جامده..))
- تسمع الزوجة والابنة من وقت لآخر صوت تكسير وسقوط الأواني،
- الزوج في كل مرة: أنا بخير اطمنوا
- بعد مده صوت انفجار البوتاجاز تفزع الابنة وتجري الزوجة على المطبخ.
- فيه ايه تاني..؟!
الزوج: البوتجاز الغبي ده مولع الفرن بقالي ساعة ومشغل الاشعال ومش بيولع..
تقترب الزوجة منه وتعيد مفتاح البوتجاز إلى الجهة العكسية وهي تقول : دي الشواية يا حبيبي.
الزوج: آآه قولي كده بقى..
– بعد وقت طويل يقف الأب وسط المطبخ وهو يحمل صينية المكرونة بين يديه، على وجهه دخان أسود، ومن حوله جبل (مواعين) .
الزوجة تسقط على الأرض مغشيا عليها حين ترى المشهد..
الزوج: كنت متأكد إني هبهرك.
بعد برهة تخرج الزوجة غاضبة من المطبخ تتجه نحو التليفون تتصل برقم وتقول بصوت انتقامي:
– ألو وحدة البلاغات، من فضلك عاوزه أبلغ عن جوزي.
……………..
– عنده ايه؟؟
……..
لا مش كورونا ، بقولك بيعمل مكروووونة ..
…………………….. موسيقى ساخرة…………………..
جريدة الفكر الحر 