” المرض النفسي ” بقلم الكاتبة/ إيمان عبيد


علامات تدل علي إنك بتتعامل مع مريض نفسي
■■■■■■■■■■
في حياتنا اليوميه بنتعامل مع عدد كبير من الاشخاص سواء اهل او زملاء او معارف او اصدقاء مقربين
كل شخص من دول بيظهر قدامنا بصوره لكن من جواه بيكون فيه حكايه تانيه
احيانا بتكون حكايه حلوه واحيانا بتكون حكايه صعبه وبيعافر عشان يعديها ودي طبيعة حياتنا كلنا
بس الحكايات الصعبه دي ممكن متكونش مجرد ازمه عابره
ممكن جدا تكون ازمه نفسيه كبيره صاحبها بيعاني منها وممكن كمان تكون حاله مرضيه .
طب نعرف ازاي ان اللي بيكلمنا بيعاني من ازمه نفسيه او حاله مرضيه محتاجه علاج نفسي وان مش معني انه بيضحك قدامنا وبيتعامل معانا عادي يبقي كويس
……….
●لو حسيت ان الشخص بيتعامل بلا مبالاه وكأن الدنيا مش فارقه معاه ولا حتي التزماته ومسؤلياته
●لو بينفعل لاقل سبب واحيانا بدون سبب اصلا
●لو لاحظت زياده او نقصان في وزنه
●لو اثناء كلامك معاه اشتكالك انه بينام كتير او مبيعرفش ينام او بياكل زياده عن الطبيعي او مبيعرفش ياكل كويس
●لو حسيت انه بقا منطوي اكتر وكلامه قل او العكس بيصاحب اي حد وكلامه كتير اكتر من طبيعته
●لو بينسي كتير ومش منتبه للاحداث حواليه
●لو مبيقدرش يحافظ علي علاقاته باللي حواليه سواء اهل او اصدقاء وبيشتكي انه وحيد لكن وحدته افضل عشان محدش فاهمه او حاسس بيه
●لو لاحظت انه بقا مهمل لمظهره او نظافته الشخصيه او بيهتم احيانا ويهمل احياناً لان ده ضد الفطره السويه
●لو بيتعامل بعنف او بيتصيد الاخطاء في الحوار او بياخد الكلام علي نفسه او بيلوم اللي حواليه طول الوقت علي ازماته ومشاكله
●لو بيتكلم كتير عن الموت بشكل سلبي
●لو بيقلل من نفسه وقدراته وشايف نفسه ميقدرش يحقق اي انجاز
●لو حسيت ان كلامه غير منطقي او بيحكي قصص تصديقها صعب و حسيت انها مجرد تهيؤات او كلامه عكس تصرفاته او تصرفاته غير مقبوله اجتماعيا ودينياً
●لو بيزعل جامد ويفرح جامد من غير سبب
●لو ردود افعاله مش مناسبه للموقف يعني مثلا حزين في وقت فرح او فرحان في وقت حزن او في موقف يستدعي خوف علي شخص ومحسش بده واي رد فعل مش مناسب للموقف بيدل علي وجود اضطراب
●لو بدأ ينسحب من الحياه الاجتماعيه ومبقاش يشارك اللي حواليه فيها
●لو لاحظت انه بيستمتع بحزن غيره او ايذاء نفسه
كل دي اعراض مبدئيه ممكن نلاحظ منها حاجه علي حد من اللي بنتعامل معاهم ونطنش او نفكر ان الموضوع عادي او انه مضغوط شويه وخلاص بس الحقيقه ان الاعراض دي لو متكرره مع الشخص وموجود منها تلاته او اكتر واستمرت لتلات شهور او اكتر فكده انت بتتعامل مع مريض نفسي ومحتاج علاج عند اخصائي او طبيب حسب حالته ونوع الاعراض اللي عنده لان كل اضطراب ليه اعراضه مش كل الاعراض دليل علي نفس نوع الاضطراب او المرض
واهمال الشخص ده هيأدي لعواقب صعبه واضرار علي الشخص وع اللي حواليه كمان خصوصا لو كان اب او ام فالابناء هما اكثر المتضررين
لو لاحظت علي نفسك تلات اعراض من دول واستمروا معاك فتره متهملش نفسك اهتم بيها وساعدها عشان نفسك تستاهل تعيش مرتاحه ..اتوجه فورا لطبيب او اخصائي ونفذ تعليماته الامر مدام في البدايه تخطيه بيكون سهل
…….
اما لو لاحظت حاجه علي حد من اللي حواليك فياريت تقرب منه وتحتويه وتسمعه من غير ما تمل من كلامه وبلاش تنصحه اي نصيحه ممكن تكون صح لو بتنصحها لشخص سوي نفسيا لكن معاه هو تضره زي مثلا كلمة قرب من ربنا او كلمة انسي او كلمة ان الموضوع بسيط وميستاهلش او كلمة انت زودتها… الافضل انك تحاول تقنعه بزيارة اخصائي او طبيب لان كل دي نصايح بتخليه يحس باليأس من نفسه اكتر ببساطه لان مخه في حاله من اللاسواء مش هيفكر بطريقة الشخص السوي وقتها ..الطريقه دي مش هتخليه يتحسن هي هتخليه يااما يكرهك لانك مش فاهمه يااما يكره نفسه وممكن يحاول يأذي نفسه كمان لانك كده حسسته بقصوره
…………..
ساعدو نفسكوا وساعدو اللي حواليكوا
عشان انتو وهما تستاهلوا تعيشوا حياه مريحه
بلاش تحكموا علي حد من الظاهر بانه سئ او كويس لان التصرفات الظاهريه احيانا كتير بتكون وسيله بيتخبي الشخص فيها من الف حاجه تانيه
الشخص اللي بتظهر عليه الاعراض دي بيكون قصادك بشكل لكن بينه وبين نفسه شكل وحاله تانيه خالص
هو في حرب نفسيه وداخليه محدش يعرف عنها حاجه
ساعدوهم بدل ما تتهموهم بالقصور
وجهوهم صح وخليكوا مصدر امان وثقه ليهم مش مصدر ضغط
ربنا يحفظ الجميع يارب من أي تعب

ايمان_عبيد

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة أكيسميت للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.