إيمان عبيد تكتب الشخصيه المرتابه أو الشكاكه 


الشخصيه المرتابه أو الشكاكه

الشخصيه الشكاكه
من اصعب الشخصيات اللي ممكن نتعامل معاها لكن
نعرف ازاي إن شخصية اللي معانا مندرجه تحت مسمي الشخصيه الشكاكه
اصل مش أي واحد يشك في موقف هنقول عليه شخصيه مرتابه او شكاكه لأن كلنا بنمر بمواقف كتير تستدعي الشك ولو المواقف دي عدت علينا من غير ما نشك يبقي غباء مننا
فمش اي حد هيشك مره في موقف هنقول عليه شخصيه شكاكه
طب ايه هي مواصفات الشخصيه دي
…………..
١-بيتعامل مع اي موقف واي حد في حياته بحذر شديد ودايماً سوء الظن هو الافتراض الاول عنده وبدون اي سبب يستدعي ده ومش لأي عيب في الشخص اللي بيتعامل معاه بل لوجود عله في شخصيته هو والأمر بيزيد اكتر لو فيه سبب طبعا.. فهتلاقيه دايما بيوجهلك التهم بدون وجود اي سبب او موقف يستدعي الشك

٢-دايماً متوقع الأسوء من اللي حواليه وبدون اي داعي فهتلافيه دايما متوقع الخيانه متوقع الغدر متوقع الكدب مبيثقش في حد وبيشك في ولاء كل اللي حواليه حتي المقربين

٣-مش بس بيقرا اللي بين السطور ده بيقرا اللي بين الحروف نفسها ويفسرها علي مزاجه حسب الرؤيه اللي مخه عايز يشوفها فممكن جدا تكون نيتك من الكلام شئ وهو يفهمه بشكل تاني حسب هواه وفي الغالب بيكون معني سلبي لأنه بيفترض الاسوء دايماً وصعب يصدق مبرارتك

٤-عقله مبيوقفش تفكير في ادق التفاصيل بس مش تفكير ايجابي يوصل من خلاله لشئ مفيد ده تفكير سلبي بيبحث من خلاله علي أدله تخدم شكوكه ولو مفيش اي ادله هيفسر اي موقف علي مزاجه عشان يعتبره دليل ويبدأ يتصرف بناء عليه

٥-بيحب التنافس جدا
٦-بيحب القياده مبيحبش يكون مرؤس
٧-بيحب يثبت نفسه بس مش عشان نفسه هو بيحب يثبتها امام الاخرين

٨-شايف نفسه دايماً صح وانه علي يقين بما تخفيه نفوس وضمائر الاخرين وبيتكلم عن نواياهم بكل ثقه وبيميل للتطفل عليهم عشان يعرف عنهم اكتر وفي المقابل بيكون كتوم معاهم لأنه بيتعامل بنظرية المؤامره ..هو عايز يعرف بيفكروا فيه ازاي ومستحيل يقولهم علي اللي جواه عشان من وجهة نظره ممكن يستخدموا ده ضده و عشان كده دايماً بيخسر اللي حواليه ومبيكملش كتير في العلاقات الاجتماعيه

٩-بيركز كويس اوي في كلامك بس مش عشانك لأ ده عشان بيدور علي معني خفي في الكلام

١٠-بيركز جداً علي أخطاء الأخرين وبيحاول يبينها طول الوقت او يعرفها ويحتفظ بيها عشان يستخدمها لما يتحط في موقف مواجهه معاهم في اي حاجه

١١-لما تيجي تتناقش معاه في أي امر مبيصدقش غير وجهة نظره وبس مهما كان كلامك منطقي اكتر مبيقبلهوش منك لأنه حتي لو حصل واقتنع بيه بينه وبين نفسه مش هيعترف بده لأنه مبيحبش يظهر اخطائه
……………….
دي أبرز الصفات اللي بيتسم بيها الشخص الشكاك واللي قبل ما تكون متعبه للي بيتعاملوا معاه ومبتكملوش اي علاقه فهي متعبه جدا ليه لأنها مخلياه في ضغط نفسي متواصل وصعب جدا يصدق اي فكره غير افكاره.
…………..
*طيب الشكاك او المرتاب ده ايه اللي وصله للمرحله دي .
غالبا بيكون بسبب ازمات وعنف مر بيه في الطفوله اومواقف خذلان من المقربين ليه وقسوه في التعامل من اللي حواليه
كل ده حسسه بعدم الأمان وعدم الشعور بالأمان ده بيخلي الشخص دايماً وبشكل مستمر عايش في خوف من المحيطين بيه وفي النهايه بيلاقي ان الحل الامثل هو انه يتعامل بحذر وياخد احتياطاته من الكل عشان يقدر يواجه أي خطر محتمل
…………………
عرفنا كده صفاته والاسباب اللي ممكن تكون وصلته للحاله دي
طب ايه ابرز الطرق اللي نقدر نتعامل بيها مع الشخصيه دي
#اولا: تقبل شخصيته وحاول تحتويه وتقدمله العطف والأمان لان هو مفتقد كل احاسيس الأمان والثقه وافتقاده ده هو اللي صنع منه شخصيه شكاكه

#ثانياً:لما تيجي تتناقش معاه خلي كلامك مختصر علي قد ما تقدر لأن هو اصلا هيفكر في كلامك كله ويدور بين الحروف علي معاني خفيه فكل الكلام ما كان مختصر كل ما كان افضل هتوفر عليه وعلي نفسك كتير

#ثالثاً:خلي كلامك واضح وصريح مفيش داعي لإخفاء شئ او الكدب لان انت كده بتزود ازمته اكتر وبتثبتله نظريته بإن كل الناس مخادعين ..ولو عارف ان في حاجه مش هتقدر تقولهاله بوضوح فبلاش الكلام فيها اصلا عشان متخسرهوش لأنه مبيديش فرص تانيه في موضوع الثقه ده ابدا وهتدخل عنده في دايرة الاشخاص الغير موثوق فيهم وبعد ما كان مجرد شك فيك هيبقي يقين

#رابعاً:متدخلش معاه أي حوار الا وانت معاك أدله واضحه غير قابله للشك وخلي كل كلمه بدليل وإلا هتخسر الحوار وخليك مختصر علي قد ما تقدر وفي نفس الوقت اشرحله قصدك بوضوح من غير دخول في تفاصيل لأن التفاصيل هتوسع الحوار وتوصلك لنقطه انت في غني عنها

#خامساً: لو هو حد من المقربين ليك اقف جنبه واتحمله ..حاول تكسب ثقته وتقدمله الأمان اللي هو مفتقده ومتخذلهوش جايز مع الوقت يتغير لأن ممكن تكون سمات الشك عنده مؤقته نتيجه لأزمه معينه او موقف وياريت تحاول تتكلم معاه كتير عن الثقه واليقين بالله والتوكل عليه لان تقوية عقيدته وثقته في الله هيساعده انه يتخلص من شكوكه في غيره
………………………………..
*ولو انت نفسك شخصيه دائمة الشك فنصيحتي
متسبش نفسك لافكارك السلبيه ومتخليهاش تسيطر عليك انت اكتر واحد بيتعب من شكوكك لأنك في دوامة شك مبتنتهيش وفي ضغط عصبي طول الوقت بسبب شكوكك
_حاول تلهي نفسك في التفكير الكتير في حجات مفيده
ابحث عن هواياتك المفضله واشغل نفسك بيها ..حقق فيها انجازات ونجاحات وطور وثقف نفسك
_حط في بالك ان معاملاتك مع الناس هي في الاصل معامله مع الله فلو الناس مصدر شك اكيد ربنا مصدر ثقه ..خليك واثق ان ربنا مش هيختارلك غير الوضع والناس الأفضل واللي تستحقهم

_لو حد خانك فهو في الاصل خان ربنا مش خانك انت
واكيد ربنا مش هيحطك في وضع وحش مع اي حد لو كان عندك يقين بيه .ربنا مبيخذلش حد ارحم نفسك من كتر التفكير مدام بتتعامل بما يرضي الله ورسوله يبقي سلم الامور لربنا وثق في تدبيره لامورك

-خد الكلام بالمعني اللي اتقالك ومتدورش وراه
درب نفسك علي كده وكل ما تيجي تفكر قوم اشغل نفسك بحاجه تانيه انت مش مطلوب منك تعرف المعاني الخفيه للامور ولا حد مطلوب منه يحكيلك عن تفاصيل زياده عن اللي عايز يقولها
لو احسنت النيه وسلمت امرك لله هيفرحك لان ربنا مبيخذلش حد وثق فيه
فمتدورش ورا حد لأن اللي بيعامل بيعامل ربنا وجزاءه علي نواياه هتكون من ربنا مش منك عشان ربنا بيدي كل واحد اللي يستحقه لا هيظلمك ولا هيظلمه

_عود نفسك متصدرش احكام علي حد ولا تاخد اي رد فعل بناء علي الاحكام دي بدون دليل ملموس عشان متخسرش اللي بيحبوك بجد
…………………

دي كانت صفات الشحصيه المرتابه او الشكاكه واسباب الشك وابرز طرق التعامل مع الشخص الشكاك
المقال طويل لكن حاولت علي قد ما اقدر اطرح الموضوع من كل الزوايا واشرحه بطريقه توصل للكل اتمني يكون مقال مفيد للجميع☺
#ايمان_عبيد

 

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.