حسن عبد الهادي يكتب عش الدبابير الحلقة13


 

 

حسن عبدالهادي

كانت مفاجأة للجميع لم يتوقعها أحد..
لقد اجتمع كل مُحرري الجريدة لرؤية النسـر الوطني وهو يتحدث على الهواء مُباشرة وقد أذاعت إحدى قنوات الإعلام حديثه..
كانت من استضافته مقدمة برامج مُحبة للمُغامرة..
لم يدخل النـسر الوطني الأستوديو بالقناع..
دخل كشخص عادي مُستضاف من البرنامج ثم ارتدى ملبسه الخاص..
انعقد حاجبا شـريف بشدة وهو يستمع إلى النـسر الجالس مع المذيعة والتي سألته
-ليه بتستهدف رجال الأعمال وإيه سر عداوتك معاهم؟
-مش باستهدف رجال الأعمال،باستهدف الفاسدين،اللي بيضروا بالبلد العزيزة عليّ زي ما عزيزة على أي مصـري شريف..
-وإنت مش شايف إن في أجهزة رقابية هي المسئولة عن مكافحة الفساد،وإن الدور ده اللي يقوم بيه أجهزة الدولة؟
-مش معنى إن أجهزة الدولة تقوم بدورها إننا ما يكونش لينا دور،كل مواطن ليه دور في فضح الفساد وكشفه،وأنا استغليت إن عندي عدد كبير من المُشاهدين،ومنهم مسئولين في الأجهزة الرقابية،علشان أحارب الفساد وأدافع عن الحق..بالصوت وبالإيد..
سألته مقدمة البرامج قاضبة حاجبيها
-يعني إيه بالصوت وبالإيد؟
-صوتي بيوصل للمشاهدين في حلقة التلات عن طريق يوتيوب،أما إيدي فهي اللي بتنكل بكل فاسد ظالم،افتكر إنه يقدر يأذي الناس وقبلهم بلده..
-إيه سر لبسك للعلم المصري باستمرار..
-العلم رمز لمصر،ومُعبر عن الانتماء..وأنا مـــصري وأفتخر..
-إيه هدفك في الفترة الجاية،مين اللي حطيته في قايمة الاستهداف؟
-هاعلن عن التفاصيل في حلقة يوم التلات..
التفتت مُقدمة البرامج إلى الكاميرا وقالت
-أعزائي المُشاهدين ده كان أول لقاء حصـري للنـسر الوطني معانا،نلقاكم في حلقات أخرى ،سلام عليكم..
وكان هذا اللقاء حديث الساعة في الإعلام المصـري ومواقع التواصل الاجتماعي..
لم يكن أحد يصدق أن يتم لقاء كهذا..
الكل تابعه وتعجب وتساءل..
وحدهم فقط المفكرون هم من شكوا في الأمر برمته..
وكان من ضمن المُشككين بـسمة..
وعندما سألتها صديقتها عن السبب أجابتها
-مش دي شخصية النـسر الوطني يا جيهـان..
-يمكن بعد تعاونه الأخير مع الشرطة حصلت مصالحة بينه وبينهم..
عادت بسمـة تهز رأسها وتقول
-ما افتكرش..
-وإيه اللي يخليكي مش متأكدة؟!
-طريقة كلام الشخص اللي بيتكلم مش هي أسلوب كلام النـسر الوطني..
-تقصدي إيه؟
-أقصد إن المُنتحل شخصية النـسر ماعرفش يمثل الدور كويس..
-لكن الإعلام المـصري اتكلم عن الموضوع..
-الإعلام المـصري كلنا عارفين بيتحرك إزاي..
-يعني كل اللي حصل ده تسميه إيه؟
-تمثيلية،برعاية الأمن..لا أكثر ولا أقل..
-وهم هيمثلوا علينا ليه؟!
-مش عارفة..
ثم عادت تسألها
-عايزة تقنعيني إن النـسر دخل مدينة الإنتاج الإعلامي بقناعه،والأمن سابه يدخل كده بكل بساطة..أو إنهم مايعرفوش شخصية المنتحل اللي استضافته المذيعة في البرنامج!
-عايزة توصلي لإيه ؟
-أنا متأكدة إن ده فخ معمول للنـسر الوطني ،محاولة لاستفزازه،الإيقاع بيه،كل ده هيبان في الأيام الجاية..
-وهنعرف منين الحقيقة ؟
-هو هيظهر يوم التلات في حلقته على يوتيوب وهانعرف منه كل حاجة..
-بـسمة،أنا ابتديت أقلق عليكِ.
-ليه يا جيجي؟
-المقنع ده ساحرك،وسالب شخصيتك تمامًا..
-هو شخصيته فعلًا هتجنني..مسيري أعرف هو مين..
-وده هيفيدنا في إيه؟
-لما تعرفي شخص هتعرفي أسلوب تفكيره وإزاي بيتحرك..
-بس هو زي ما بتقولي بيفاجئنا في كل مرة..
-هو تحركاته غير متوقعة،بس لحد إمتى هيفضل محير الناس كلها..
-فضولك الصحفي هيغلبك..
ضحكت بـسمة وقالت
-عايزة أقول لك،فضولي مزدوج،صحفي ونسائي في نفس الوقت..
هزت جيهـان رأسها وقالت
-مش هتسكتي غير لما تودينا في الداهية..
-المهم تبقى داهية حلوة!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.