هبة الله حسن تكتب تزويج القاصرات


 

تعليمات كل مقالة
خليك عارف ان المقالة طويلة فلو مش هتكلمها متقرهاش.
ممنوع تاخد المقالة كوبي وبيست والطريقة الوحيدة لنقلها هي الشير حفاظا على حقوق الملكية.
تقدر تدعم المقالة بطريقتك الخاصة في نطاق حدود حفظ الحقوق .
هتلاقي المقالة دمج بين علم النفس وعلم الاجتماع علشان تكون واخد بالك.

سمعنا كتير عن جوازات انتهت بالفشل سواء طلاق او هجر او العلاقة قائمة بس كل واحد فيهم في وادي وعايشين علشان العيال بس ، منهم اللي بينتهي بمشاكل ومحكمة الاسرة شاهد عيان علي كده ومنهم اللي بينتهي بما يرضي الله ودي قليلة جدا ، في الغالب بيكون سن الأزواج ما بين ال20 وال 30 وبيحصلوا علي لقب مطلق / مطلقة ، اللي هو مرحلة عمرية المفروض انها نضج كافي لتحمل مسؤوليات الزواج والتربية وما الي ذلك.
لكن نظرًا لأسباب مختلفة بتفشل مثل هذه الزيجيات زي مثلا عدم الوعي الديني بالزواج والحقوق والواجبات لكل طرف فيه ، او عدم النضج الفكري اللي بيسمح بكيفية التعامل مع كل واحد من الطرفين ، او أسباب أجتماعية زي مثلا انتي كبرتي لازم تتجوزي في حين ان البنت ممكن يكون عندها 25 سنة اللي هو لسه بدري يعني ، او بعض الأهالي اللي شايفين ابنهم تلفان ومقضيها يمين وشمال فيجوزوه ويقولوا الجواز هيهديه والحقيقة انهم بيساهموا في ظلم بني آدم جديد وتخريج أسرة معاقة اجتماعيا لكن تحت مسمي شرعي.
طيب بيحصل كل ده مع من هم بين 20 الي 30 عام فمابالك باللي بيحصل في تزويج القصر وانا هنا هقول تزويج وليس زواج لأن الفرق اللغوي بين الكلمتين كبير وتقدروا تبحثوا عنه في المعجم.


هبدأ معاكم بتعريف بسيط للقصر وهو الشخص الذي لم يبلغ من العمر 18 عام ، يعني اللي لسه مالهوش اي أهلية قانونية في القيام بالأفعال التي يسمح بها القانون زي مثلا شراء او بيع شئ او قيادة السيارة وما الي ذلك من الإجراءات القانونية.
ودي احصائية بسيطة قالت ان من بين 3 بنات في بنت اتجوزت وهي دون عمر الزواج وده الحقيقة رقم يخض .
في اخصائية تاني قالت ان حالات الوفاة اثناء الحمل والولادة ما بين عمر ال 15:19 سنة ودي بردو نتيجة تخوف وتخلينا نسلط الضوء علي القضية دي.


تعالوا نعرف الموضوع ده لسه وليد العصر ولا من زمان.
يعني مثلا في روما القديمة كانت مجرد ما البنت توصل لسن ال 12 سنة تتجوز والأولاد عند سن ال 14 سنة ، يمكن العامل الاجتماعي مختلف دلوقتي عن العصر ده لكن التركيب الجسماني والنفسي هو هو.
_ إنما الحضارة المصرية القديمة فكانوا بيجوزا الاطفال لمجرد سن بلوغهم في كتاب اسمه ” موسوعة الحضارة المصرية القديمة ” كان في جملة منسوبة للحكيم بتاح حتب قالت ” إذا كنت عاقلا فأسس لنفسك منزلا ” .
لكن مش معني ان الموضوع من قديم الزمن انه حاجة صح لأن دي ليست الا عادات وتقاليد يعني بإختصار ” هذا ما وجدنا عليه أبائنا ” وده لا يجوز من وجهة نظر الدين والعلم .
وده جزء من الخلفية التاريخية للموضوع .


_ طيب تعالوا نعرف أنهي مجتمع في الظاهرة دي اكثر انتشارا ، وهل الظاهرة دي تقتصر علي المجتمعات النامية فقط ولا موجودة كمان في المجتمعات المتقدمة ؟!
في الولايات المتحدة الأمريكية طلع التعداد السكاني عام 2017 وقال ان اكتر من 59 الف بني آدم اتجوزوا خلال عام 2014 لم يتجاوز عمرهم 17 سنة
ده يودينا في سكة تانية وهي هل أسباب تزويج القاصرات مقتصر بس علي الأسباب الاجتماعية زي الفقر والجهل والاحتياج للمال ؟!
والحقيقة لأ في اسباب دافينة للشروع في الجريمة دي زي بالظبط أسباب الحملات الصليبية علي بلاد الشرق اللي كان هدفهم المعلن هي حماية رعاياهم وحمل الصليب وكل الأسباب اللي لما تشوفها من بره تقول لا الناس دي عندها حق ، انما اسبابهم الحقيقية هي كانت اغتصاب الأراضي ونهب الخيرات للبلاد .
ففي موضوع تزويج القصر تكون الأسباب الظاهرة هي الفقر ومبدأ استر البنات لكن في الداخل هي ممارسة الإغتصاب لكن في إطار سليم.


نيجي بقي لسيكولوجية البنت التي يتم تزويجها بتولية من ولي أمرها وبارك
يتم تزويج البنت في الاعمار بين ال 10 سنوات وال 17 سنة والفترة العمرية دي بتكون من بداية المراهقة لحد منتصفها تقريبا ، طيب المرحلة دي ايه هي خصائصها أولا دي مرحلة لسه بينمو فيها العقل وازاي بنقدر نكون أفكار وطبعا علشان يحصل ده محتاج المراهق لغذاء جيد جدا ” وهنا انا مقصدتش غذاء البطون ” وده بيعتمد علي الأهل بنسبة عالية والمجتمع المحيط بنسبة أخرى ، فلك ان تتخيل طفلة مش بتسمع في حياتها غير أفكار عن الجواز والابناء وانها كبرت وبقت عروسة وماشابه من الكلمات اللي بتدخل تستقر في العقل الباطن ويبدأ يخرج منه سلوكيات كلها بتؤدي لفكرة الزواج زي مثلا تلاقي طفلة لا تتعدي ال 12 سنة ولابسة ملابس لا تليق بمثل هذا العمر.
او تبدأ تتصور في أوضاع مختلفة مقلدة نجمات التليفزيون ما هي الفكرة اللي مسيطرة بقي انها لازم تبقي حلوة علشان تعجب الراجل اللي هيجي يتجوزها وفي الغالب بيحصل تسرب تعليمي للنماذج دي
_ في المرحلة دي كمان بيكون في تذبذب كبير بين اني كبرت وأقدر اعتمد علي نفسي وبين اني لسه محتاجة الرعاية الكاملة من أهلي وهنا ازاي اولي مسؤولية بيت وزوج وأطفال لطفلة هي اصلا محتاجة الرعاية والاهتمام .
_ عندي كمان من السمات السيكولوجية في المرحلة دي عدم اكتمال النضج العاطفي ، ازاي هتقدر البنت هنا تختار شريك حياتها بطريقة سليمة ، ازاي اصلا هتعرف يعني ايه راجل سوي ومتزن يقدر يتحمل مسؤولية الزواج ” وهنا بردو مش بتكلم عن المسؤولية المادية فقط ” ، هو كده مش بيتم التجني علي الفتاة دي وارتكاب أبشع الجرائم في حقها وحق اسرة جديدة وبالتالي حق مجتمع ، هل ده ميعتبرش ظلم لنفس أخرى ؟!


نيجي بقي للأضرار الصحية اللي بتحصل للطفلة الزوجة والأم دي ، في المرحلة العمرية دي بيكون نمو الغدد غير مكتمل والغدد دي مسؤولة عن الطول والنمو الجسمي وفي غدد مسؤولة عن تنظيم الطمث ، ففي المرحلة دي بيكون الجسم شايل الطاقة دي كلها علشان يكتمل النمو ودي تغيرات مش سهلة ع الجسم ” في بعض حالات الإعاقة بمجرد وصول الطفل المعاق لفترة المراهقة يتوفي لأن جسمة الضعيف مقدرش يستحمل التغيرات الجبارة اللي بتحصل دي ” فنقيس بقي علي الكلام ده ان لما الطفلة دي بتتزوج وتحمل بطفل أخر فبتتحول كل الطاقة اللي المفروض الجسم مخزنها للنمو وتروح للحمل وبالتالي بيكون في مصايب كتير وحالات وفاة للأمهات الاطفال دول ولو عدوا من خطر الموت فهيقعوا في خطر الأمراض الخطيرة زي فقر ضغط دم ، او الإجهاض بسبب عدم اكتمال حجم الحوض ، وطبعا 99% من حالات الولادة دي بتكون قيصرية لنفس سبب عدم اكتمال الحوض ولأسباب طبية كتير مش تخصصي.


وانا بدور قرأت دراسة عن الخيانة الزوجية عند النساء ، كانت من ضمن أسبابها هي التزويج المبكر اللي بيكون في الغالب لشخص يكبر عن عمر الفتاة ضعف عمرها بسبب الموضوع ده بعد فترة ولما البنت بتوصل لسن من 23 الي 30 سنة بتكتشف انها معشتش اللي كان المفروض تعيشه وتبدأ تنجرف في طريق الشيطان ” وده مش مبرر للخيانة الزوجية ” لكن ده سبب خطير لتزويج القاصرات
فيبقي السؤال هنا هل كل ذلك من العدل ؟!
هل من الحكمة اني ارمي بطفلتي للتهلكة تحت شعار ” هذا ما وجدنا عليه أبائنا ” ؟!


واخيرا أتمنى أكون قدرت اوصل معلومات جديدة وأشرح القضية من منظور جديد.
#تزويجالقاصرات
#انا
بتعلم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.