أيمن بدراوي يكتب انترفيو


 

قصة قصيرة
إنترفيو
أيمن بدراوى

فوق سطوح منزل متهالك ….. جلس مع أصدقائه فوق حشايا قديمة متناثرة ينفث بعمق دخان شيشته العتيقة خاصته كقاطرة متهالكة كثيفة الدخان وضاحك صديقة قائلا بحرقة واضحة …… “محسوبك مبخت بخت الخروف الى بيتخانق عليه اتنين جزارين ليلة عيد الأضحى” …. فإستنكر صديقه المقولة مقاطعا ….. “ياعم اسكت كفاية انك لسه ف شغلك ماسبتهوش أمال احنا نعمل ايه بس اللى شغال شغلانه نص كم والى بيدور لسه والى بقى ينزل نص مده والى والى …… أحمد ربنا وحط في بقك منديل ريا وسكينة!! تنهد مخرجا نفسا أعمق من ذى قبل اتبعه سحابة من الدخان بحرقة قائلا ………. اسكت أنت ماتعرفش حاجه …. احنا ف شركتنا بنستفز حرفيا مواعيد ومعاملة وتغيير طبيعة شغل واختراع كل فترة يقلب نظامك رأسا على عقب لدرجة إن اللى ربنا بيكرمه وبيخرج على رجله من الشركة كلنا بنعمله حفله ولا حفلة الليمبى وهو خارج من السجن ….. ضاحكين بأصوات صاخبه يتبعها اصوات اخرى لاداعى لتوصيفها!…. يااااه للدرجه دي ؟؟؟ واسخم واضل سبيلا ….. طب تصدق ؟ … واحد زميلى ساب الشغل من فتره قابلته صدفه ف المترو بيقولى انا كنت عاوز ادخل اي مصحه اعمل استشفاء وحاجه كده زي التأهيل النفسى علشان اعرف اتعامل مع البنى ادمين الطبيعيين بشكل عادي من تانى!!!! مستمرين ف الضحك بهيستيريا ويستنكر احدهم ويرد ….. طب ليه ياعم ماحاولتش تهباء من المكان ده وتشوفلك حاجه حتى قبل الازمه ياااااه الواحد ياما دابت رجليه بس كنت عاوز اطلع على مكان مناسب ويعوضنى عن الشقا …. مش اطلع من هم لهم والواحد بخته لوز العنب تصدق فكرتنى بحكايه حصلت من سنتين تلاته كده بس ايه ياض مسخره!! احكى ياعم احنا ورانا حاجه دوس يابا دوووووس طب هات الشيشه دي خليها مناولة مش مقاوله, ….. متأملا بمنظر النجوم الساطعه قائلا: من فتره قابلت حد قريبنا بالصدفه لقيته شغال ياعيال ف حتة شركة ….. راس مال اجنبى وهيكل تنظيمى ومجلس اداره محترم … شركة بجد بقى مش عزبة ملكيه فرديه زي شركتنا صاحبها طايح فيها وفينا خصومات عشوائيه وتصفيه بالمزاج وتفنن فى الذل واختيار ناس تكرهك فى شغلك وحياتك وكل الى حواليك …….. لا هم ناس طبيعيين بنى ادمين! وصلاحيات متوزعه وحقوق والتزامات ومعامله ايه …. بقولك بنى ادمين ……….. واخدينلى بالكم ياعيال ؟؟؟ بنى ادمين رعايه صحيه بجد بأماكن محترمه وتأمينات من اول مابتستلم شغلك وايه بقى مكان مخصص للأكل وكمان ايه وجبات ويونيفورم وحجات تشيب انا اما قالى عاوزين حد قلتله ابوس على صوابع رجليك صباع صباع ارشقنى ف اي جوب تايتل قالى بس هناك لازم تثبت نفسك …….. قلتله وحياتك بس اقعد مع حد ولو عاوزنى ابقى مدحت حتى ابقى مدحت ده انا قتيل المهم دبرلى معاد يامعلم ورحت بقى اتشقلبت ف الدولاب وظبطت الطقم التمام ورحت عند “حمدى فتله” ظبط شعرى ودقنى وفوطه سخنه وحركات ولا كأنى رايح اخطب دخلت يامعلم لقيتلك بتاع النظافه ماشى ف الطرقه بالعربيه الى شايله خيرات ربنا معطر جو ايه وملمع ارضيات ايه وديتول مطهر ايه …. شكل القزايز انضف من الى بتشرب فيها ف بيتكوا ياض يادرش! ….. “متجاهلا سبابه فى الرد” …… بنى ادمين يابا انا كنت خايف ادوس ع الارض جامد لا احسن تلطش مع انى ملمع الشوزه مرايه وراكب تاكسي من الباب للباب المهم دخلت يامعلم اوضة مش مبهرجه بس كل حاجه فيها نضافه وتوزيع إضاءه وشباك كبير علشان الشمس تملا المكان وتريح العين والمنظر بره كله شجر علشان زارعين حوالين المبانى كلها والمكاتب مش ملزقه ف بعض عندهم حاجه اسمها ال ايه التلوث البصرى علشان الكتمه والتكدس دي بتأثر على انتاج الفرد ونفسيته وممكن تخليه ياخد قرارات تضر المنشأه ونفسه !!!! اه والنعمه قالولى كده!!! إنت متخيل يامان؟؟؟ احنا فى شركتنا الدنيا زنقه ويادوب ممرات كده بين المكاتب والبضاعه والى عاوز يعدي بيكاد يتحرش لا اراديا بزمايله الرجاله علشان اصلا مافيش اناث تستحمل المعامله بتاعتنا ماعلينا…. المهم الوظيفه يامعلمين كانت نصها مع بتوع الاتش آر بنسق معاهم المصاريف والكشوف بتاعة الحضور والمرتبات وبظبطها ماليا وبجمع تكاليفها …. احد الأصدقاء مقاطعا إياه بعصبيه ياعم الله يباركلك احنا اه كلنا خريجين جامعات بس نسينا الهري ده اختصر!! .. فلوسها حلوة يعنى؟؟… … شوف الواد البروطه اقوله ايه يقولى ايه ………. طب ياسيدى هي كبدايه كانت ممتازه بالنسبه للمعامله البنى ادمينى والمواعيد وهناك النمو زي القشطه يعنى طول مانت موجود بتزيد من غير بقى محلسه لده وعصفره لدوكها وتظبيط ومسح جوخ لمعرفش ايه المهم بعد ما كتبت ابليكيشن اد كده 8 صفحات بالعنجليزي وشوية الافلام الى بنعملها داونلود نفعت والله والواحد يادوب بالعافيه يفهم المقصود قعدت مع الراجل نحكى ساعه وكنت مذبهل بصراحه انهم بيهتموا بالعنصر البشرى بالشكل العجيب ده تخيل بيقولى يناسبك كذا طب هاترتاح ف كذا طب يعتبر ضغط عليك لو اشتغلت ف كذا وكذا ؟؟؟؟ ياباشا احنا كنا بنشتغل بالجزمه حرررررررررررررتك كنا نبقى عيانين ولو حد راسه نزلت ع المكتب والمدير عدى يقوله انت جاي تنام هنا عندك خصم كذا وكانوا بيتفننوا يخترعولنا شغل فوق شغلين الشغل وياويلك لو اعترضت ولا حتى ابديت رأيك ان ده مالهوش لزوم!!! المهم قالى انت مبدئيا معانا وحتى كمان ايه قعدنى على مكتب فاضى وخلانى اعمل شوية حجات تجريبيه ويالهوى ياعياااااااااااال مكتب ايه وقعدة ايه انا كل مافتكر مكاتبنا الى لازقه ف وش بعض والفايلات الى هاتقع على ضهرك لو ريحت الكرسى لورا سنتى ولا الطرقه الى بنمشى فيها بالجنب تحسبا لا حاجه تشبط ف البنطلون ويتقطع وتبقى وقعه مهببه! قالى انت مش فاضلك غير قعده روتينيه مع المدير المالى ودي لمجرد بس يتعرف عليك ويدردش معاك مش اكتر انما شغلك الاساسى هايكون معايا انا, … انا بقى اتفتح بابتسامه ولا التمساح بتاع الامازون من الفرحه يامعلم وقلتله انا يشرفنى طبعا يافندم وبلا بلا بلا وفضلت مستنى صاحبك التانى ده وانا هاموت واقعد على مكتبى الى جربت عليه وفضلت متخيل نفسى يااااااااااه معقوله هاصحى مبسوط واتشيك وانزل على شغلى جرى مش بالعافيه ولا بنعل سنسفيل ام اليوم الى اشتغلت فيه ف مكان زي ده وبشوف ناس زي دول وبيتحكم فى مصيرى واحلى سنين عمرى زي دوكهم فضلت مستنى ياعيال ان البيه التانى ده ييجي مجاش قالى علشان ماضيعش وقتك ممكن تمشى وهاحددلك انا معاد مخصوص وتجيله يوم تانى تخيللوووا انا بيتقالى علشان مايضيعش وقتى اسندونى ياهوووو ……………….. يامحترم ده احنا كنا بنفكر نعمل دولاب بره الشركه نشيل آدميتنا واحنا داخلين الصبح!!! ده احنا من كتر البؤس كنا بنفكر نحط لايحة تنظيم العمل “الى متعلقه بالغصب بالاسم علشان مفتشين التأمينات ومكتب العمل بس ونحطها بدل دواسة ويلكام الى ع الارض توفيرا للنفقات وانفراطا وإنغراقا فى الواقعيه وانت تقولى حرصا على وقتك؟؟؟ انا شكلى فعلا محتاج تأهيل علشان اعرف اتعامل مع البنى آدمين الطبيعيين دول اتضح ان احنا الى مش طبيعيين المهم روحت يومها وانا برقص ف الشارع فشر عادل امام وهو راجع بعد جوازته الصورى فى فيلم زوج تحت الطلب …. وفضلت مستنى بقى اليوم الى اخلص فيه من الروتينيه بتاعة المقابله التانيه دي وفضلت بقى ابص لصحابى ف الشغل وانا مكتم ع الخبر واقول هاتوحشونى ياعيال وكل ما المدير يطلب منى حاجه اقول يالا حلاوة روح يابن اللذين بكره هاجي ارمى الاستقاله ف وش حرررررررررررتك واكسر قله بنفسى ع الباب يومين ياعيال وكلمنى الراجل قريبنا الى عرفنى ع المكان وقالى المدير الى قعدت معاه مبسوط جدا منك وبيقول انت هاتكون اضافه للشركه …… ياعم ابوس ايدك هاعيط كده اضافة ايه ده انا لو عاوزيني بشنطة هدومى اجي ابات مكان الامن اجي انتوا مش متخيلين احنا بيتعمل فينا ايه ……….. انا اقول كده وبتكلم جد والراجل يضحك وفاكرنى بهزر ………… الناس دي مشافتش بهدله يالا حظهم حلو …. قالى اجي بعدها بيوم ونزلت فعلا وانا خلاص حاطط ف بالى ربعايه واستلم الشغل ورايح وكلى ثقه وعيونى بتلمع بقى والكونفيدينت ف العالى وبصيت ع المكتب الفاضى وقلت ف سرى جايلك ياجميل جايلك وانا على آخرى قعدت قصاده بصلى بصه طويله كده مريحتنيش و قالى انت فلان الفلانى ………….. اه يافندم تحت امر حضرتك …. إنت قعدت مع مستر فلان؟؟ ….. حصل يافندم وقالى اقعد مع حضرتك علشا….. قاطعنى ببرود …. اوكي اوكي عندك فكره عن الشغل الى مطلوب منك؟؟ …. رصيتله بكل تنسيق وترتيب كل الى عرفته فى المقابله الى فاتت ….. طيب طيب برضه بيقاطعنى …. فى سرى بقول “وبعدين بقااااااااااااااا مالك ياعم الحج فيه ايه بس” ؟؟؟…. بلهجه بارده قالى تعرف ايه عن موازنة تخريد النفايات الاكتوبلازميه؟ طب نسقت كشف ضريبة الارباح الارتوازيه مع اضافة بند الحلقات الحلزونيه؟ طيب قفلت قوائم الارباح الجوفيه …. طب عملت كم دراسة جدوى ف ….. يافندم انا محاسب اه وبشتغل بقالى كذا سنه اه بس كنت مجرد ترس ماكينه فى شغلى بعمل حجات كتير بس القوايم دي تخصصيه بحته وبتتعمل بعد كشوف ومراجعات واعتمادات و بتنسيق مع المدير المالى والمحاسب الق …… حضرتك انا بسأل وانت تجاوب!! ….. احنا هنا لازم المحاسبين بتوعنا بيكونوا ….. و كمان بيعرفوا ……… ده غير نظام …….. طبعا النقط دي مصطلحات مجعلصه وحجات عمرى ماسمعت عنها ولا شكلى هاسمع بس حسيت انه الراجل اوفر شويتين وبيتكلم ف حجات اصلا بعيدة عن شغلى الاصلى …………. ايه حكايتك ياعم؟؟ و ايه التلاكيك دي؟؟ فى محاوله يائسه قلتله يافندم انا اشتغلت فعلا يوم ماجيت بشكل تجريبى ومستر فلان قالى انت ملم بكل مهام الوظيفه و ….. برضه مصمم يقاطعنى بغلظة .. مستر فلان يتكلم زي ماهو عايز انما الشق المالى يخصنى وانت تحت ادارتى ولازم تعرف ده كويس بنفاذ صبر قلتله وانا تحت امر حضرتك المفروض ابتدى امتى شغل علشان اعرف اجيب اوراقى من شغ…. مقاطعا تانى! حضرتك لسه الموضوع ده محتاج دراسه وتنسيق وانا معايا الفايل بتاعك وبياناتك وهابقى اتصل بيك!! انا بقى حسيت زي الى لبس قلة فخار معتبر على أم راسه ياعيال ………….. اه نفس القله الى كنت هادشدشها ع الارض يوم ماسيب شركتى!! ادور على مستر فلان وانا عينيا بتدمع م الدهشه والغيظ وفضلت مستنيه وحكيتله على الحوار الشلل من طقطق لسلاموا عليكوا مرورا بالمحاسبه النوويه الى كان عاوزنى افهم فيها استنكر الموضوع وقالى ايه ده ….. عمره مابيحصل كده ده بسيتعبط طب انت ضايقته ف حاجه؟؟؟ والمصحف ابدا …. طب اتكلمت بطريقة غلط طب حس من كلامك انك مش ملم بكذا ….. صدقنى مافيش غير الردود الى حكيتهالك والى عمرى ماعملته ده بسبب انى ترس ف مكانى زي ماحكيت لحضرتك وحضرتك الى سألتنى فيه واشتغلت فيه مظبوط!!!! قالى ولا يهمك انا هاقعد معاه واخلص الموضوع ده وبرضه اعتبر نفسك معانا انشاء الله ودي مسألة وقت! قلتله ابوسك ده انا قلبى وقع ف بنطلونى قالى مافيش حاجه وكله خير انشاء الله انت بس خليك جاهز ….. جاهز ؟ ده انا ابيت تحت البوابه لو حابب وفضلت ياعيال مستنى يوم اتنين تلاته …………اسبوع!! لا بقى ده حوار ….. اكلم واسطة الخير الى عرفنى ع المكان مايردش ……. اسيبه يومين مايردش ……………. كنت فعلا وصلت لأدنى مستوياتى النفسيه …. عارف الى يعزمك على اكلة بتحبها وانت جعان موت ويحط الاكل وقبل ماتمد ايدك يقولك معلش هانضطر نشيل الأكل ونأجلها ليوم تانى!! …. المهم قلت خلاص وكأنها لم تكن مش مشكله بس افهم بس ايه حصل انا غلطت ف ايه ايه الى بوظ الدنيا بعد ما كنت خلاص اشتغلت تقريبا ………….. فضلت ورا الراجل لحد ما رد عليا وقالى انا صدقنى مش عارف اقولك ايه انا وشى منك ف الارض ياعم قول عارفين ان كل شيء نصيب …… بس اعرف يمكن لو حاجه معينه فيا او عيب او قصور اصلحه لما بعد قالى انت زي الفل ولحد دلوقت كل ماتيجي سيرتك الراجل يقول فعلا كان شاب كويس ………. ياعم سيبك من جو بانوراما دراما ده وقولى فيه ايه هاطق! الى حصل ياسيدي ان ف كل شركه الكبار فيها بيعتبروا زي المتنافسين كده على الموظفين على القرارات على السياسات العامه على الدنيا …. قلتله عارف وعندنا اسواء من كده بكتير وبالمفتشر بياكلوا بعض ويعضوا ف بعض واحنا دايما الضحايا قالى اه الشركة ادارتها ونظامها اجنبى وكل حاجه والحقوق بتاعة الناس كلها تمام …. بس الرؤوس الكبيره دي ومنهم المدير الى قعد معاك تانى مره ده دخلك التاريخ يامعلم انا طبعا شتمت المدير ده ف سرى وشتمت الواسطه ده اضعاف طبعا من كتر غيظى وحرق دمى من اسلوبه ف التطويل …………. قاطعته بنفاذ صبر …………. ياعم ابوس على الودنه الى طالعه من ضافر صباع رجلك الصغير سيبك من البلاغه دي وقولى ايه الى حصل انا هاطق حاضر حاضر ياسيدي انت الى ضيع فرصتك انك كنت عكس الناس كلها ……….. بمعنى قبل ماتتضايق ان كتر الشكر فيك هو الى ضيع فرصتك!!! الى هو ازاي طيب!؟؟ قالى ان المدير الى قعد معايا ف الاول وعجبته جدا شكر فيا قدام المدير التانى لدرجة انه شك انى اكون قريبه او جاي تبعه وهاتعين علشان اكون الراجل بتاعه فى الادارة وحاجه زي حصان طروادة كده وانقل اسرار واحاربه عن طريقه والهرى ده قلتله ده انت الى جايبنى وانا اول مره اشوفه ومكنتش هاعمل كده ولا نيله انا جاي اكل عيش وابداء حياة بقالى متخرج سنين ولسه مابتديتهاش !!! قالى هو اتلككلك للاسف وجاب حد اضعف منك بكتير علشان يضمن انه مايكونش من طرف التانى قلتله انا ولا من طرف تانى ولا طرف تالت ولا ثورة مضادة انا مش تبع حد مانت عارف وبعدين هو كان لازم يعنى يشكر فيا اوى كده ؟؟ ……………. طب شكرا ياعموا سلام سلام كفايه تعب حضرتك معايا ………….. كفايه ضحك ياض يا …………. منك ليه بدل ماقوم ادغدغ الشيشه دي على نافوخكوا !!! لا دانت بجد مالكش حل بطل العالم ف الفقر يخربيت سنينك!!! وده يقول : عبث الاقدار بطولة : والتانى يعلى عليه : ضحية الثناء ….. سناء جميل ولا ثناء شافع وضحك …………. والثالث يعمل فيها عميق : حينما يقع الإنساس فى مستنقع اشغاله فينتهى به الامر الى المزبله ….. مزبله ف عينك يابن ال…… اصوات ضحك الاوغاد اصحابى كادت ان توقع سطوح المنزل على راس السكان وقتها!!
تــــــــــــمــــــــــــــت
@�V�[��

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.