مجرد بنت
حنان العسيلي
البنت اللي لو تزعل
بتاخد جنب م التفاصيل
وترسم دمعة في عيونها
في صورة بسمة محتارة
البنت اللي لو بتحس
يدوب بشعور بيقلقها
ترتل وسواس الحيرة
في ذكر وقرب م الخالق
تنام حاضنة عروستها
تسافر جوا رحلة في حلم
وتصحى تصاحب الفراشات
تغني أغاني طفولية
ترجَّع ذكرى منسية
وتقرا قصص خيالية
عشان تحلمها مرة في يوم!
تروح وتتوه في أبيات شعر
وتسرح جوا لحن جميل
ويمكن تنسى مواعيدها
وتنسى عقارب الساعة
ودنيتها وزحمتها
برغم الطفلة جواها
بتكبر كل ما بتكبر
بيفضل سر أنوثتها
في قوتها وكرامتها
ومين قال الأنوثة
تكون في ضعف البنت
وسكوتها؟!
جمال البنت قوتها
يزين تاج أنوثتها
كرامة وكبرياء الحور
وتلقى حقيقي دنيتها
في يوم ما تشوف خطاويها
وتهدا حيرتها وشرودها.
جميله و لسه عاوزه كلام 🌹
إعجابإعجاب
جميلة جدا
إعجابإعجاب