إوصفها
بحبك
و ليل البرد ده شاهد
علي النار اللي بين
ضلعيني في بعادك
بتحرقني بقسوه كأني
لا انا عاشق
و لا غاوي
و لا واقف علي اعتابك
و انـا الدايب
أنا الدايب فـ نني عنيكي
و فـ دلعك
و انا السكران بعنابك
و بصحالك و بنعسلك
و بحلم امتي ادوق عسلك
و امتي الحضن يحلا بك
و امتي الصبر يفهمني
و يفتحلي بإيديه بابك
قالولي إوصفها دي اللي انت
نسيت علشان عاشقها الناس!
تكونش دي ماسه خبيتها
و جبت عليها جوز حراس؟
ياريت أقدر…!!
مكنش زماني متعذب و متكدر
مكنش هتبقي فيا النار
ياريت ألقالها
وصف يليق بأوصافها
مكنتش كل ليله احتار
ساعات ألقاها وخداني لجنه و نور
ساعات بتكون لي بستاني
و طارحه زهور
ساعات أكتر
بتتمنظر
عشان عارفه انها تقدر
تخليني كما العصفور
ازقزق حب و أغني
و ارفرف جمبها تمللي
و لو كان الجناح مكسور
عنيها الناعسه مليانه
شقاوه و عشق ليا انا
و شفايفها تدوخني
بشهد العشق مليانه
و نظرة رمشها الأسمر
مفيش منها ف دنيانا
و آه من ضحكها الرايق
و من رقتها آه يانا
اذا مشيت بتتمايل
كما النسمه ف وسط زهور
ولو لبست هدومها البيضا
تبقي ملاك جناحه النور
و لو قالت بتنهيده بحب و ادوب
الاقيني في تنهيدها
كأني بشوف ورا المستور
فَـ متقولوليش انا اوصفها
سيبوني ف ضيها مبهور
#Garrahi
