صناديق
– شكلك تعبان؟
-يعني شوية …
-مالك شايفك بتقرا كتب كتير.
-فعلا في حاجات كتير مااعرفهاش
-رغم انك كاتب!
-يعني
-يعني مش محتاج قراءه، دانت يجي قريت ١٠٠كتاب
-ههههههههههه
-بتضحك ليه ؟
-قريت حوالي ٧او ٨الالف كتاب
وليه دا كله؟ تعب علي الفاضي..
-لأ.. طبعا..كل ما تقرأ اكتر كل ما تحس بجوع اكتر.
– جوع ايه؟
– جوع انك تعرف
– يعني الكتابة بتيجي من القراءة ، بس؟
– عارف كل انسان عنده ٣صناديق
– صناديق ايه؟
– الصناديق دي كنزه الخاص ، صندوق كل ماسمعه ، صندوق كل ما قراه ، صندوق كل ما شاهده
-إيه كل دا ؟
-ورغم انك ممكن تشوف أو اقرا أو تسمع نفس الحاجات لو انا قريبك أو اخوك او صاحبك لكن ممكن تفسرها أو تفهمها بطريقتك.
– قصدك ليك طريقتك في استيعاب وتحليل ال٣صناديق.
-فعلاً.
– طيب ازاي تغيير اشكال الأفكار؟
بانك تغيير مصادرها..
– مش فاهم
-افهمك ، مش مجرد تقرأ اللي معروف لكل الناس ، تحاول تعرف كل يوم كاتب جديد ، ومجال جديد
– كاتب جديد منين ؟
من الانترنيت ، القوائم لا تنتهي .
– زي؟
-انت قريت ادب اندونيسي ، أو أدب فنزويللي
ازاي ؟
– بالعربي…
-وممكن بلغة تانية انجليزي أو فرنسي.
– إيه تاني؟
-غير طريقة الاستيعاب يعني مثلاً حاول تسمع الكتب !
-ازاي؟
-الكتب المسموعة.
-وايه كمان !
– تعرف كل الفنون التسعة ؟
-تسعة؟
– ايوه.. دور عليهم…
-انت ليه مش بتقول المعلومات بسهولة؟
-لما تدور هتفهم حاجات احسن ، والمعلومات تثبت اكتر.
-والأسئلة الخمسة؟
-اسئله إيه؟
-اسئله الكتابه
-أيوه هو انا ماقلتهاش لك
-لأ
-اقولهالك.. اين ،متي ،كيف ،لماذا، من؟
-اشرح بقى
-شارحه نفسها طبعا بس اشرحلك اكتر ، دي اسئله الاتصال او المعرفة اللي بيدور عليها القارئ ويحاول الكاتب دائما الإجابة عليها .
-مثل ؟
-اين تحدث احداث القصة؟ ، كيف حدث الحدث؟ ولماذا؟ ، من البطل ومواصفاته
-ومتي؟
-زمن الاحداث وحدثت في قد ايه؟
-دي مش حاجة متعبة؟ كل قصة كده
-يمكن متعبة اول مرة لكن بعد كدا تبقي بالبديهة.
-سمعت كاتب بيقول ماتكتبتش وبجد جالي إحباط
-ههههههههههه
-بتضحك بتغيظني
-لأ…. انت فهمت الجمله بالمقلوب
-إزاي؟
-الجملة قالها كتير بأشكال -مختلفة.. يمكن قصدك ريلكه؟ الشاعر الألماني.
-وركه؟ مين الحاج؟
-ريلكه من أكبر شعراء الألمان وقال “إن استطعت إلا تكتب لا تكتب”
-اهوه بيقول ماتكتبتش!
-قصده لو عرفت تعيش من غير الكتابه يبقي ماتكتبتش لأنها غير مهمة في عالمك.
-كده فهمت… طيب سؤال ايه الفارق بين المؤلف والكاتب؟
-فرق كبير طبعا المؤلف من الفعل ولف بمعني نسق أشياء مختلفة ليظهر منتج جديد فمثلاً تأليف مسرحية هاملت هي توليف من صنعة شعر شكسبير ،كتاب تاريخ الأمير هاملت الدنماركي ، وصنعة المسرح .
-والكاتب؟
هو اللي بيتخصص فى الكتابة الفلسفية أو التاريخية
-مثل ؟
-أسامة أنور عكاشة مؤلف ، لكن ذكي نجيب محمود كاتب.
يعني المؤلف بيكتب قصص ودراما ، أما الكاتب ممكن يكتب دراسات أو فلسفة
-دي وجهة نظر فى سؤال تاني؟
كتير…
-خلليه المرة الجاية تعبت…
-اخيرا.. مع السلامه
شكرا خالص ل د وليد سيف صاحب فكرة الصناديق وسمعتها منه فى برنامج تلفزيوني
