طبق الفول
– صباح الخير تفطر ايه جنابك؟ كافيار كالعادة..
– هههه ياسلام… طبعا فول بالزيت الحار.
– وكتر الطحينه..
– تعرف القصة المضبوطة عامله زي طبق الفول التمام..
– ابتدينا… قول ياعم
– كلمة قصة يعني حدوته واي حدوتة بتتكون من شخصيات واحداث ولغة….
– انهي فيهم الفول ؟
– قصدك العنصر الأساسي في القصة.. ماحدش يعرف حسب الكاتب مثلاً حد بيقول الشخصية هي العنصر الأساسي أو الأحداث هي المحور.
– ودا بيفرق في طبق الفول؟قصدي القصة؟
– لأ
– طيب ممكن تفهمني اكتر..
– الشخصيات دي ليها طريقه في التكوين كأنها بتتولد قدامك!
– بتتزلط قدامك؟ منك؟
– ههههه مش لما بتشوف حد لأول مرة بتعرف ايه؟
– بيتقدم لي أو بيقدم نفسه لي
– يعني بتعرف الإسم المميز ليه !
– مثلاً….
– ج.ت.ج
– نعم؟
– جرجاوي تامر جرجاوي…
– مين؟طب ليه ماتكونش ست
– جميلة تيسير جميل…
– حلو برضه…
– بعد الإسم بتعمل ايه؟
– بتبص تشوف الجتة قصدي الشكل…
– ايوه بتشوف الشكل الخارجي أو الفسيولوجي ودا اول المكونات ثم
ثم بيتكلم .. وتبدأ تعرفه
وهنا بتبدأ تعرف عالمه الداخلي نفسيته يعني أو بالمصطلح الأكاديمي السيكولوجي ،ثم
بتعرف بيحب ايه؟او مين؟ وعن عيلته؟
صح جدا بتعرف عن حياته الاجتماعية وعلاقاته بالناس يعني تعرف الجانب السوسيولوجي …
– قولها عشر مرات ههههه
– لأ انا الدغ فى السين يارخم
– يعني كدا الشخصية جوانبها ٣ حجات
– ايوه فسيولوجي ، سيكلوجي،سسيولوجي.
– شكل خارجي، نفسي، اجتماعي.
– إيه قبل ايه؟
– مش شرط ممكن تبتدي من الشكل الخارجي أو النفسي أو الاجتماعي.
– أمثلة بقي؟
– ممكن نبدأ من علاقته مع أمه المتوترة بسبب انها اتجوزت عمه بعد وفاة أبوه ،فهنا بنتكلم على حد رفيع منكوب
– مين؟
– هاملت.. أو اوريست
– ازاي نعمل فروق بين الشخصيات
لأ بقي نكمل المرة الجايه
معتز صلاح
