حسن عبد الهادي عش الدبابير الحلقة 17


 

عش الدبابير
الحلقة 17

حسن عبدالهادي

دخل شقته في منتصف الليل عندما رن هاتفه الخلوي بغتة فأجاب..
سمع صوت أنثوي ذي شخصية يتساءل
-أستاذ شريف معايا؟
-أيوه..مين معايا..
أجابه الصوت صاحب الشخصية
-معاك المذيعة نـادين فريد مُقدمة برنامج”مصـر الليلة”..
-آه أهلًا بيكي..
-كنت عايزة أقابلك في أقرب وقت..
قضب حاجبيه وكأنها أمامه وسألها
-مُمكن أعرف السبب؟
-الموضوع يطول شرحه،تحب أعدي عليك بكره في الجريدة..
-ما فيش مشكلة..
-الساعة كام؟
-اتنين كويس..
-خلاص تمام،الساعة اتنين هاكون في مكتبك..
وبعد أن أنهى الاتصال جلس أمام التلفزيون وبدأ في مُمارسة هوايته في الانتقال من قناة لثانية عندما توقف عند إحدى القنوات وأخذ يُتابعها باهتمام..
لم يكن يعلم أن نـادين هاتفته بعد أن انتهت من برنامجها مُباشرة،والذي يتم إعادته في نفس شبكة القنوات الخاصة في قناة أخرى وقد رآها تجلس وتتحدث قائلة
-أنا اتحديت النـسر الوطني إنه يظهر معايا في البرنامج،وخلصت له التصاريح اللازمة للدخول،لكن للأسف هو انسحب مني وماجاش..حلقتنا مُستمرة النهار ده في كشف شخصية النـسر الوطني..معانا الليلة الدكتور ماجد الأعسر..مدرس الطب النفسي بجامعة حلوان..هيكلمنا عن إيه سبب شخص بيلبس قناع..وهل ده ليه علاقة بضعف الشخصية ولا لأ..استنونا بعد الفاصل..
موسيقى هادئة تنساب من التلفزيون وشـريف يرفع رأسه لأعلى،مُغمضًا عينيه وكأنه يحاول تنقية ذهنة من أي تفكير يسبب له ألم حتى سمع صوت نـادين وهي تقول
-عُدنا بعد الفاصل والدكتور مـاجد الأعسر..أهلًا بيك يا دكتور..
-أهلًا بيكي يا آنـسة نـادين..
-دكتور خليني أسألك سؤال مُباشر..إزاي نقدر نحلل شخصية النـسر الوطني؟
ابتسم الثلاثيني وقال
-الحقيقة السؤال ده ممكن نقول عنه إنه سؤال مُركب،الشخص المُنتحل قناع النـسر الوطني عنده ميل كبير للمُغامرة،متأثر جدًا بأفلام الأبطال المُقنعة اللي كنا كلنا بنتفرج عليها زمان،زي باتمان..سبايدر مان..زورو..النمر المقنع..مع الملاحظ إن كل بطل مقنع بيمثل دولة..
-يعني حضرتك شايف إن النـسر الوطني مُحب للظهور ومُدّعي بطولة؟..
-مش بس كده..لأ..هو ارتدائه لعلم مصر في كل مُهمة بيقوم بيها له دلالة قوية جدًا،لو حضرتك تلاحظي معايا..باتمان مثلًا مؤلفه واحد إنجليزي..سبايدر مان أمريكي..زورو مؤلفه شخص مكسيكي..النمـر المقنع ياباني..وبالتالي..حب الشخص اللي لابس قناع فانديتا وعلم مصر حولين جسمه يقول..أنا بامثل القومية المـصرية..
أومأت نـادين برأسها مُتفهمة قبل أن تقول
-واضح كمان إنه مارس ألاعب قتالية،أو رياضات دفاع عن النفس،لإنه في كل مُهمة قام بيها،كان بيعتمد على سرعته وفنونه القتالية..
-بالظبط..وتصدير للناس صورة إنه مُكافح الفساد..
ابتسمت نـادين لأول مرة وقالت
-إنت عارف يا دكتور إني شفته بعيني..
لم يصدق الرجل وسألها
-معقولة..وما بلغتيش عنه ليه..؟
قالت الفتاة بنبرة ضاحكة
-ما لحقتش واللهِ..هو بيستخدم أسلحة زي الخطاف مثلًا بيتنقل بيها من مكان لمكان،وكإنه بيطير..
-بالظبط..هو متأثر أكتر بشخصية باتمان..فإذا كان باتمان بيحارب الجريمة،فالنـسر الوطني بيكافح الفساد..
-معانا اتصال تليفوني من سيادة العميد أيمن المُهندي..أستاذ البحث الجنائي بكلية الشرطة..اتفضل يا فندم..
-أهلًا بيكي يا نـادين..البرنامج بتاعك هايل،وأنا من مُشاهديه،والحقيقة الحلقة مهمة جدًا وبتوضح حاجات كتير..
صمت للحظة قبل أن يقول
-واحد..المقنع ده عايز يوصل صورة للشباب إن خد حقك بدراعك،لإن الدولة مش هتجيب لك حقك..دي نقطة..اتنين..هو فكره هدام بدليل القناع اللي لابسه..لو تابعنا فيلم”فانديتا”..هنلاقيه فيلم بيدعو لإقامة الثورات وهدم الدول..وبالتالي هو لما يلبس القناع ده..فهو بيدعو لهدم الدولة..تلاتة..هو فاكر إنه بشوية الحركات اللي بيعملهم دي بيتحدى الدولة..ما يعرفش إن الدولة المـصرية ممكن تجيبه لو حبيت..لكن المسألة بتاخد شوية وقت للبحث والتحري..مش عايز أطيل عليكم…وتحياتي..
قالت نـادين وهي تُداعب سماعتها الداخلية
-معانا اتصال آخر..آه المحامي سامي صابر..اتفضل..
-الحقيقة يا آنسة نـادين الراجل المقنع ده..مُدّعي الوطنية..أيام وهيتجاب..وهيتفضح قدام الناس كلها..أنا قدمت بلاغ للنائب العام النهار ده ضده..لإنه بيسعى لهدم مؤسسات الدولة وتعريض السلم الاجتماعي للغلط..غير الإشاعات والأكاذيب اللي بينشرها على يوتيوب..وعدد مُشاهديه تخطى الاتنين مليون..عشان كده كنت لازم أقف له ولازم نوقفه عند حده..
وعقب انتهاء البرنامج أغلق شـريف التلفزيون قبل أن يفتح مفكرته المُمتلئة بالأسامي الحمراء والزرقاء ويكتب اسمًا جديدًا..


اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.