هبة الله حسن تكتب عقوق الأبناء


عقوق الأبناء ….
المقالة طويلة فلو مش هتقراها للأخر متقرهاش علشان متبقاش بالسلب مش بالإيجاب 😊
…………

متعودين دايما على كلمة عقوق الآباء ومعظم كلامنا وتوجيهاتنا بتكون ازاي الأبناء يتعاملوا مع آبائهم وأمهاتهم لكن على الصعيد الآخر أن للأسف في عقوق آباء لأبنائهم ودي حاجة القرآن والسنة اتكلمت عنها بردو .
لو اتكلمنا على المستوى الأول لمظاهر عقوق الآباء لأبنائهم هتكون اصول التربية الدينية السليمة ودي بتبدأ من أول اختيار الزوجة وده كان واضح في قول رسول الله صلى الله عليه وسلم في الحديث الشريف عَنْ أَبِي هُرَيْرَةَ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ : ( تُنْكَحُ الْمَرْأَةُ لِأَرْبَعٍ : لِمَالِهَا ، وَلِحَسَبِهَا ، وَلِجَمَالِهَا ، وَلِدِينِهَا ، فَاظْفَرْ بِذَاتِ الدِّينِ تَرِبَتْ يَدَاكَ ) سيدنا النبي هنا خاطب الرجال في كيفية اختيار الزوجة طيب ليه ؟ وهل فعلا ابني له حق عليا اني أختار أم معينة ليه بطريقة بردو معينة ؟ والإجابة هنا نعم ابنك له كل الحق انك تختارله أم سوية تعرف ما لها وما عليها من حقوق وواجبات ، الأم هي اللي بتغرس القيم الدينية والقواعد المجتمعية السليمة في الطفل من وهو لسه بيرضع بل كمان بالعكس ده بيكون من يوم الولادة كمان وده هقوله في مقالة تانية ، بس ركزوا معايا 😉 .
كمان سيدنا النبي قال
قال صلى الله عليه وسلم: (تخيروا لنطفكم فإن العرق دساس) – رواه ابن ماجه و الديملي ، سبحان الله علم الوراثة الحديث أثبت أن الجنين بيكتسب من أبويه صفات عضوية وخلقية وعقلية علشان كده لو سمحتي وانتى بيتقدملك عريس فكري كويس اوى واختاري راجل يصلح أن يكون أب قبل زوج فلو هيكون أب كويس تأكدي أنه هيكون زوج صالح 😃 .
…………
طيب اللي فات ده كان بالنسبة لإختيار الزوج والزوجة وعرفنا خلاص ان ده حق أطفالنا علينا ، نيجي بقى لباقي حقوقهم البسيطة ان حضراتكم تختاروله اسم مناسب ويكون ذو معنى صالح ، للأسف دلوقتي في أسماء كتير منتشرة في ظاهرها أسماء جميلة لكن لما نيجي نبحث عن المعنى بنلاقي معنى صعب جدا ودي حاجة بتفضل مع الطفل طول العمر طبعا ، الموقف ده كمان حصل مع الفاروق
. (( جاء رجل إلى عمر بن الخطاب ـ رضي الله عنه ـ يشكو إليه عقوق ابنه ، فأحضر عمر الولد ، و أنبه على عقوقه لأبيه ، و نسيانه لحقوقه ، فقال الولد : يا أمير المؤمنين ، أليس للولد حقوقٌ على أبيه ؟ قال : بلى ، قال : فما هي يا أمير المؤمنين ؟ قال عمر : أن ينتقي أمَّه ، و يحسن اسمَـه ، و يعلمه الكتاب ـ إي القرآن – . قال الولد : يا أمير المؤمنين ، إن أبي لم يفعل شيئاً من ذلك ، أمّا أمي فإنها زنجية كانت لمجوسي ، و قد سماني جُعَلاً ـ أي خنفساء – ، و لم يعلمني من الكتاب حرفاً واحــداً . فالتفت عمر إلى الرجل و قال له : جئت إلي تشكو عقوق ابنك و قد عققته قبل أن يعقـــك ، و أسأت إليه قبل أن يسيء إليك .
…….
عرفنا ازاي نختار أم وأب صالحين لأولادنا واختيار أسمائهم وتربيتهم تربية صالحة على أسس دينية وأخلاقية سوية ، جميل احنا كده خلصنا ؟ لا والله معلش الموضوع لسه كبير وطريقه واسع قدامنا ، لو سمحت لو سمحتي اعرفوا ان أولادكم مش من كرسى ولا ترابيزة مكان ما هتحطوهم هتلاقوهم ، اعرفوا كمان أنهم مش لازم ابدا يكونوا نسخة منك ومش لازم بردو يعيشوا ويمروا بنفس التجارب اللي انت مريت بيها سيبهم يختاروا حياتهم ويتعلموا بنفسهم وده طبعا بيكون في سن معين وخليك عارف كويس جدا أن كل اللي بتزرعه في أول 7 سنين من حياة طفلك هتشوفه وتحصده في سن ال 21 سنة وفيما بعد وخد بالك خد بالك خد بالك ان طفلك بيتعلم اكتر بعنيه من أنه يتعلم بالأوامر هتفضل تقوله اعمل ده وبلاش تعمل ده صدقني مش هينفذ غير اللي بيشوفك انت ومامته بتعملوا قدامه .
……….
طيب انت ممكن تكون بتعوق أولادك ازاي بطرق انت مش بتكون واخد بالك منها أصلا ، بص يا سيدي في مصيبة اسمها التفرقة في المعاملة وهي طبعا انك مش بتعامل كل أولادك زي بعض سواء بقى هتبقي بتدلع ابنك الولد علشان هو ولد وأخواته بنات تهتم بيه في دراسة ولبس ولعب ورياضة ومش سائل أصلا في أخواته البنات اعرف انك كده بتبني حاجز بينهم وبين بعض وبتزرع الكراهية والغيرة بينهم وللأسف هنا هتكون غيره هدامة هتلاقي يا اما الولد بقى متدلع وللأسف فشل دراسيا يا هتلاقي بناتك بقوا بيكرهوك وبكده انت بقيت عاق لأطفالك والشاهد على كده القصة المعروفة قصة سيدنا يوسف وأخوته ، كان أبوه يعقوب عليه السلام بيفرق في المعاملة بينه وبين باقي أخواته فكانت النتيجة كره إخواته ليه وكيدهم بيه ومحاوله التخلص منه و كان هو عارف مشاعرهم نحيته علشان كده قاله ” فيكيدوا لك كيدا ” معروف ان ممكن قلبك يميل لحد معين من أطفالك لكن خليها في قلبك فقط ومتخليهاش سلوك خارجي .
…….
طبيعة التعامل بقى ما هو انت لا تبقى متشدد اوى فتطلع جيل متعصب من الرجال أو جيل منكسر وضعيف وهش من النساء ، خير الأمور الوسط دايما ، بلاش تكون ديكتاتوري في ارائك وافكارك طيب شوف كده سيدنا النبي عمل ايه مع الولد اللي جيه يستأذنه في الزنى ” إن فتىً شابا أتى النبي صلى الله عليه وسلم .. فقال : يا رسول الله ! ائذن لي بالزنا ! فأقبل القوم عليه فزجروه .. وقالوا مه مه ! فقال : اِدنُه ، فدنا منه قريباً ، قال : فجلس . قال أتحبُّه لأمك ؟ قال : لا والله ، جعلني الله فداك . قال : ولا الناس يحبونه لأمهاتهم . قال أفتحبه لابنتك ؟ قال : لا والله يا رسول الله ! جعلني الله فداك . قال : ولا الناس يحبونه لبناتهم . قال أتحبُّه لأختك ؟ قال : لا والله ، جعلني الله فداك . قال : ولا الناس يحبونه لأخواتهم . قال أتحبُّه لعمتك ؟ قال : لا والله ، جعلني الله فداك . قال : ولا الناس يحبونه لعماتهم . قال أتحبُّه لخالتك ؟ قال : لا والله ، جعلني الله فداك . قال : ولا الناس يحبونه لخالاتهم . قال : فوضع يده عليه ، وقال : اللهم ! اغفر ذنبه ، وطهر قلبه ، وحصن فرجه . فلم يكن بعد ذلك الفتى يلتفت إلى شيء ” ، انت عارف هنا سيدنا النبي عليه الصلاة والسلام بيعلمنا ايه ؟ ان لغة العقل والحوار أفضل بكتير جدا من لغة التعصب والأمر والنهي وأعرف لو كان الأسلوب ده نفع معاك وانت في مثل سنه ف مش هينفع مع ابنك خصوصا في الوقت الحاضر ، كل اولادنا أسئلتهم ليه وعلشان ايه ، دايما عايزين يعرفوا السبب محتاجين دلائل وبراهين علشان يقتنعوا فجهز نفسك لده من دلوقتي .
أنا عارفة ان المقالة طويلة بس مهمة جدا لكل اب وأم عايزين يربوا ولادهم على المنهج السليم ، لكل اتنين مقبلين على الزواج ونفسهم يكونوا أسرة صالحة في المجتمع ، لكل اتنين عايزين الجنة ربوا أولادكم تربية سليمة وادخلوا بيهم الجنة ، يلا منشن لكل زوج وزوجة لكل أم وأب وقولولهم أولادكم ليهم حق عليكم .
#برالأبناء
#لعلك
تنجو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.