محمد جراحي يكتب يحب القط خناقه


يحب القُط خنّاقُه

 

حبيبتي
زهرة الصبار
بنُـدرتها و نضَـارتها
و لمعتها اللي تحت الضي
حبيبتي
زهرة الصبار
بـوحدتها و مرارتها
و شوكها اللي فـ لحمي الحي
حبيبتي
ضحكة الترحال
سفر هادي و انا الحادي
لها الماضي و عمري الجاي
عنيفه زي موج البحر
رقيقه زي موج البحر
و فيها من هدوء البحر
و مين اديٰ الأمان للبحر غير قلبي
و مين جواه حنان للموت في احضانه
و مات زيـي
و مين داق العسل منها و شـاف غلبي

تقصقصني ورق نعناع علي عيدانه
و تنقلني جدور مغروسه ف حيضانه
ف رمل الشط تزرعني
و تسقيني من المالح
اموت علي كفها الآسي و تبكيني
و انـا مسامح

ميفهمنيش سوي اللي
شاف هواه و داقُـه
ما بين كل الخلايق دول
يحب القط خنّـاقُـه

تدلعني كما العيل
بلمسة كفها النونو
و تضحكلي و تبكيلي
تدَوب قلبي فـ شجونه
تلخبطني بمشاعرها
تسيب العقل فـ جنونه
و ترقصلي و تغمزلي
تقربني و تبعدني
تشوقني و تهرب مني، فجأه تعود
و انا علشانها مستحمل بَـدُوق المر و مكمل
عاهدت عنيها م الأول
محطش بينّـا أي حدود

أصون الود بالمعروف و أعيش فيها
وطن لملمني م الغربه و خبّانـي
و لما الحزن جه يقتلني، حيَّـاني
و مدت إيدها جوايا تشد الليل
و خوف الليل
و زرعت فيا نجمتها أم ضي أصيل
و عملت مني سِهرايـه توَلعني
في ليلها عشان أونسها
بنور هادي مايكشفشِ
و يجرحها
و لكني،
في عز ما ببقي نور هادي
و فاتح ليها دراعاتي
و كفي عليها برقيها
تقوم تجري ، تغَلّـبني
و تبعد عني و تسيبني
و أنـاديها.. ترد عليا ببعادها،
و تبعت ليا مرسالها
يقول بتقولك استناها اوعي تروح
أموت لحظـتها و أستني
في يوم تيجي ترد الروح
تلوموا عليا ما تلوموا
مسَلِـم قلبي من يومُه
وقعت فـ قلبها النونو
و آديني فى صف عُشاقُـه

ميفهمنيش سوي اللي
شاف هواه و داقه
مابين كل الخلايق دول
يحب القط خنّـاقُـه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.