محمد جراحي يكتب ولد غلبان


ولـد غلبـان

 

كان في زمان
حتة ولد غلبان
جه في البلد دي وحيد
لا له عمام
و لا له خيلان
و لا حد مد له إيد
الأب كان شارع
الأم كت جامع
و الأرض كانت سرير
ع اللقمه بيصارع
عن عمره بيدافع
في زريبة الخنازير
عدت سنين المعيَله
ملبسش فيهم مريله
و لا خط فـ الكراريس
حسب الولد عمره
خاصم أبوه و أمه
و شاف في نفسه عريس
و لابد لو هيجيب
عروسه يفتح بيت
و البيت هييجي منين
راح اشتغل و اتوجع
سافر و هج و رجع
راجل معاه قرشين
قال يا بلد قاسيه
رجلي هنا راسيه
و بنا لحبيبته البيت
و خده السفر تاني
خلف ولد تاني
و اهو فهمه الحواديت
ان البلد أمنا
نسقيها من دمنا
لنا فيها سقف و حيط
كبر الولد إبنه
كَـل قمحه مع تبنه
أصل الزمن دوّار
و بلدنا من مُده
شرقانه علي عودها
و الغيط سرح فيه حمار
قال الولد يابـَه
بلدنا دحلابه
سيبني أمشي مرجعشِ
الأب قال يابني
لينا جدار مبنِــي
انـا منه مطلعشِ
بس الحمار نهَّـق
سيادته كان بِزهَق
من قِلة البرسيم
الطين نشف جدا
منع الآدان يدّن
و بَدَع كلام السيم
يطلع يقول عيني
تجديد خطاب ديني
يقبض علي الفاهمين
يخرج يقول فكَه
و بنمشي بالزَكَه
ياكل فلوس بالدين
خلصت ألاعيبه
و فاضي كان جيبه
طماع حمار الشين
ايه رأيكم يعني
و الناس بتسمعني
نملي جيوبنا منين!
قالوله شعبك خلاص
عالقرش لَف و لاص
و لا عدش لاقي الطين
الناس بقت بتجوع
الكل بقي جربوع
لولا ساترهم بيت
رد الحمار قال بيت!
هاتوا الورق و القلم
اكتب قانون العدم
و ننفذه بحديد
علي كل واحد بنيٰ
ان شالله من ميت سنه
يدفع علي الجدران
عاوز يعيش بالهنا
و ندوَقُه حُبنا
مرضيش هيلقي النار
هاتوا الفلوس هاتوا
و انتم بها تباتوا
و تبقوا وطنيين
هدوا البيوت هدوا
لو حتي بيت جده
يورث حفيده الأنين
خرج الحمير الصغار
هايجين واخدهم سُعار
يهدوا ما يخلوا
خرج الولد و أبوه
يدافعوا عما بنوه
سحلوهم الاتنين
علي طين بلدنا الزين
و بدمهم حَلّْـوا
الاب بص بعنيه
و زحف ببطنه وايديه
لابنه اللي نام جمبه
قال يابني قوم و احيا
قوم كمل الرحله
بس ف بلاد تانيه
بلد يكون زادها
من لحم اولادها
ماتعِش و لا ثانيه.

كان في زمان و الآن
راجل بنام قلقان
علي طفل في اللفه
لـ يقوم يلاقي الجدار
فوق الرضيع منهار
و مكفنه فـ قُفه.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.