محمد جراحي يكتب لأول مرة


أول مره

.

لأول مره أنا هكتب عنِك
من كم سنه ساكت
بس كلام متعان لك
من ست سبع سنين
سبع اسنين جِفاف عْجاف نشاف
العيش الحاف كسّر سِنـي
و سني بيكبر
و انتي اللي فـ قلبي قمر نـوَر
و مابيطَـفّـيش
شهد مكـرر مايعكركيـش… غير سيرتي
و سرتي انتي ..
هربتي، هجرتي، خرجتي و ما رجعتي
كأن ما بين ضلوعي و قلبك..
زي ما بين الأخ و أخته لما تقوله… ماتجوزليـش.
ما بتحنيش!؟
ما بتغنيش كلام قلبي!؟
ما تفتكريش!!!!
دَ انا الجارحي أو الجراح
أو ملعون أبو ده اسـمٍ بفكرني بعسل ريقك في نطقك ليه
ده انا بقلبي بقول اسمك و امصمص شفتي و اداريـه…
قلعتيني و انا زرعتك
و اكلتك ثمار عشقي و شبَّـعتك
بلعتيني و سمِنتك و نشفتيني من عشقك
و لما عطشت
شرشفتيلي من عرقك، ما رَوِتيـني
ما شربتيـني من عسلك!
و لكن برضه بَـنعَسلك
و بحلم بيكي و برَسْمَـك علي كَـسمِـك و فوقُـه هذه الشـامه
لأول مره بكتب لك
لأول مره .. بعد فوات سنين يـامـا.

ما مصدقاش اني عشقتك ليه؟
يعني اما اقابلك كل يوم، لألف يوم
و المده بالمظبوط علي العداد بتطلع 907 يوم
كل يوم من دي الليالي كنت جمبك
كنت بتكلم و سامعك.. كنت دمعك
و ابتسامك
كل يوم من دي الليالي الشمس تشهد
و القمر بالليل يلالي برضه يشهد
و الحروف اللي فـ خيالي جايه تشهد
و الموافي و التجاره
و الاداب
و دكة العشاق
و شجرة النبق اللي خبت تحت منها دبلتين فالصو ..
بتشهد
اني كنت بكل عزمي بحب فيكي
و انه محصلش ان ايدي بتجافيكي…
بل علاوه
ايدي باست كل جسمك شبر شبر
و عرفتني اني في حضنك ببقي شبل
و اني مهما عملت ع الحبِّـيبَـه نسر،
انا جوه حضنك ببقي شبل
في شبر عشق
غرقت، دوقت، سكرت، نمت، صحيت، و ملقتكيش جواري
ملقتش كفي اللي اتبرم فيكي حَـوَاري
ملقتش حاجه غير ضوافرك غارسه فيا
حتي و انتي بتسبيني ..،
برضه علمتي عليا !!

قعدت ست سنين بحاول أكتشف
سبتيني ليه
ده انا الوحيد اللي بصفاه شافك،
و مش بعنيه
انا الوحيد
و ان كنت كداب اصرخي، او قولي شيء
كل اللي صاحبك
او مسك يدك
او اتمدد في يوم جمبك
ده كان عارفك
عشان عاوزك
و مش هقدر
اقول اكتر
لاني بَغِـير
بغـير حتي عليكي انتي برغم انك عرفتي كتير
بلاش تقوليلي انك كنتي حاسباني من التانيين
انا أكبر
انا اشطر
و انا اللي معايا جلدك كان بيتقشعر
اذا حنيت
و وشك كان بيرقص م الفرح بيا
اذا هليت
و هزات رعشتك ديا، بتندهلي اذا اتمنيت
فمتقوليليش بإني كنت واحد بـس
و إن الصف علي بابك كتير اترص
متضحكيش علي سحنتي.. قلبك بمين كان حس؟!

انا كل قصدي افهمك
اني اما كنت بكلمك
آمنت لك، آمنت بك، سلمت لك و سكنت لك
و عمري – و انتي تشهدي – منويتش بيكي الغدر
لا طمعت أطولك زيـهم أو أسهرك للفجر
انا كنت شايفك ستهم و بشوف ملامحك بِكر
هتصدقيني ان قولتلك
انا لسه فاكر طعم بوستك؟ !
متصدقيش ازاي. ما انا ياما بوستك

( هـل تذكريـن الصوت حين تُقبليني و كيف تنتظرين غفواتي فـتُكبليني !؟)

و بعد منك عشت أيام سود عجاف
ماروتش جوفي حروفي و لا حروفك
مهمنيش لما زمان قالوا عليا خروفك
و فضلت أداري عن العيون اللي بتنهش جتتك
لحد ما اقتنع التيران ان الليالي عدلتك ، إلا أنا.

ليه بعد اخلاصي و ودي..
تصدي خدي، تعضي يدي، كأني واحد منهم
و انا لا استغليتك و لا غَشِيـتك و لا غَـشِّيـتك
و لا كـالكلبه خليتك ، ترافقيني.
و لا كنت باعمل زيـهم
ردي عليا يا مجرمه
يا مقسمه
يا مهندمه
عليا ليه بالرد بخلانه
و ليه تروحي زيـهم، و انتي اللي عجبانا
فاكره اما قولت لك بحبك، قولتي عاشقه انا
و لما جيتي و رميتي
و جنتك علي كف ايدي
و قولتي سقعانه
نجدت لك جتتي مرتبه و لحاف
لاجلن تباتي و تصحي دفيانه

( عندي قصائد لم أستطع إكمالها و طيفها حولي. أشعر بأني كلبها و طوقها حولي! ماتت هي ، من دون علمٍ أم فضلت غيري؟!)

ان كنتي عايشه انا بندهك
انا بلعنك، انا بعشقك، انا هتبعك، هستتبعك، هستحملك و هدلعك، بس اندهي..
بس اندهي أو شاوري ، أو باني من طرفٍ خفي
تعالي ليا
و لحد أصغر ضُفر فيكي انـا هاحرُسُـه
ده معدش من ريحتك عليا غير نفس،
آاااخر نفس…
متخلينيش اتنفسه.
انا بعترف اني
لا يوم عرفت بعدك أو هشوف
و عمري ما دوبت و اتمعشقت
و ان القلب لساه بكر، متفضتش أحلامه
و ان الحب لسه جنين، متعدتش أيامه
و ان الغلطه جوه لساني أصل لساني ده، دحلاب
و انا دايب في نار و عذاب.
بقيت مغلوب
بنام و غطايا من دمعي و من قهري
أيـا قمري!!!
يا قمري استني ويايا بلاش تاخد معاك الضي
سابتني بعد ما صابتني، سابتني قتيل
انا مش حـي

هبطل أحبك و اجيب سيرتك
هبطل ابوس تراب رجلك
هبطل سُكْـر و هفوقلك، هبطل أدلعك في الشِـعر
هبطل أسكنك فيا
و هقتل زرعتك ديا
و هزرع شوك علي عنيا
و هتعلم أغاني الصبر.
#Garrahi

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.