دم الطفولة
إهداء لروح الشهيد/ محمد الدرة في ذكرى استشهاده ٣٠ سبتمبر ٢٠٠٠.
حنان العسيلي
جايز في يوم
نلاقي أطفال العرب
حبة ورق
وشوية شخبطة
ع الحيطان
مكتوبة بدموع الفراق
من حضن أب بيتوجع
لما في يوم بيوحشه
ضمة وليده اللي رحل
ماكانش ذنبه إنه بريء
ولا كان في إيده يوم سلاح
ما عرفش غير يحلم يعيش
يفرح ويرضى بالمتاح
وسلاحه كان ألوان بتضحك
لما يغيِّم الاحتلال
ويسوِّد الدنيا في عينيه!
لكن المحتل الإسرائيلي
قلبه حجر
و ضعيف جبان
يحتل حتى الضحكة
في قلوب الصغار!
يحتل كل اللحظات المبهجة
يرقص على أصوات أنين الأمهات
ويبيد بوحشية أي جناحات
بتخوفه أحلام طفولة بريئة
تكبر في يوم ..تصبح حقيقة
اختار الدرة
صوب تجاهه سلاح الخسة والدناءة
ما رحمش دموعه
استكتر عليه لحظات براءة
وبين ضلوع أب مقهور
اتقص وراح جناح العصفور
يصرخ الأب ومين هيسمع؟
والعالم كله مش فاضي يفهم
بأغنيتين ممكن يردوا
وباستنكار اتخذوا موقف!
دم الطفولة مش هيسكت
دم الطفولة عايش بيهتف!
