تصدق ايه!!
تصدق باللي خلق الخلق
و بنوره انجلت ظلمات
برغم انك شديد قاسي
و بتبَكي عنيا ساعات
و بتخليني أعاتبك ياما
و تّـوْهني فـ الحكايات
و بتجيب السبب فيا
و انا وليَه
و عندي بنات
تصدق.. !
وحد الواحد..
مينفعش اني اسيب حضنك
و لا انسي انك هَنَا روحي
و لا وريتني يوم حزنك
و لا إنك أمان قلبي،
في خوفي كياني بيضُمك
و بين الناس جدار عالي،
بيحميني من الصدمات
تصدق
لما بـكويلك جلاليبك
بحس هدوء ملفلفني
و اقيس بالشبر
طول نفْـسي و امشيهم علي جفني
تغيب من نفسي غيرتي عليك
و روحي عليك تحَلّفني
تقول اياكي تيجـي عليه
كفايه عنيـه
لا بتفارقك، و لا بتنساكي فـ الحكايات.
تصدق ايه!!
