محمد جراحي يكتب  كان نفسي اعيش الحلم


كان نفسي اعيش الحلم

 

كان نفسي أقول كل الكلام
بالصوت و مكتبشي
اللي اعشقه، أحضنه و اللي أكرهه ..
أشتم و مكبتشي
ملعونه فيكي السياسه
ملعون ابو السلطه
ملعون بـ حُبك يا مصر
و بغير عليكي و اموت
كبرت بدري و لأني
مبحبش المرايات
عرفت بالتجربه
اني عجوز حكايات
لسه في كلامي هواكي،
لسه ف ملامي سكوت
و بدل ما اشيلك في عيني،
شايلك ف قلبي .. هَـم

كان نفسي اعيش الحلم

كان نفسي أسافر
أهاجر
و اشوف بلاد الله
الارض دي تشوفني
و التلج ده يزورني
و النخل ده يشيلني
كما نسمه حاضنه هواه
الناس تكون للناس
و الحلم سايد و حاكم
في البحر نلقي الأمان
بيهل عالموجه عايم
لكني تايه و سارح
و خدت من السفر إسمه
و خدتني كل المطارح
و لا خدت غير اغتراب
و الغربه تِـعبان و ناعم
و لا نابني غير سمه
كل الطرق حيطه سد
و مفيش طريق حاوي باب
و بدل ما اعيش صقر طاير، ..
عايش ف قلبي .. هَـم

كان نفسي اعيش الحلم

كان نفسي أعزف و اغني
و ارسم و أرقص و اطير
لا حد م الناس يلومني
و لا ماضي يرسم لي حـد
انا اصلي ضد الحدود دي
بيني و بين الحلم
كل الخطاوي اللي عدت
كانت بتنزل تدب
ياما الطرق فيا صدت
و انا فيل مقاوح يهب
و بحور تهيج موجها عالي
و انا مركبي بيرمي هلب
راسي في وش المهالك
شايل مع الصبر حلم
و انا كل املي و منايا
لو يوم و اعيش الحلم

لو عشت حلمي اللي راسمه
هتكوني كُونِـي و رَسمُه
قلبك ده لو يرضيٰ اقاسمه
كل الحياه اللي فيا
أحلف و ندرٍ عليـا
ما تسيب اديكي إديا
و تكوني ضحكة عنيا
و الضي في النني
و تكوني حربي و سلامي
و تكوني طب لآلامي
و سكوتي انتي و كلامي
و انتي اللي تسمعني
بس الحقيقه اننا
لا عرفنا يوم بعضنا
و لا رغبه بتضمنا
و لا حد فينا اهتـم
و كرهت فيكي الحلم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.