زي صوت فيروز تكتبها حنان العسيلي
زي صوت فيروز
لما يملا الدنيا دموع
ليلة شتا
زي عود مهزوز
لما يعلا غناه
ويونس كل الأفئدة
زي قلب عجوز
لما قبل أوانه ينتهي
ولساه فتى!
ميت سؤال وسؤال
مالهمش حلول
ولا أجوبة
يبات غريب الحال
فيبات سكوته
مستخبي في شكوته
يصحى م الأيام
ينسى يومه وأمسه
ورحلته!
تعزف الأوتار من نبضه
لحن كان في يوم جميل
يسمعه بدقات قلبه
ودموعه رافضة تسيل
يتوسم في الجاي بكرة
ومافيش لأمسه بديل
ويدور في دايرة لمنتهاه
ويقول في الآخر هي حياة
تصاحبه أوتار موسيقى
وتعدي بقلبه م المتاهات
تطوف وتلف جنبه
وهو غرقان في السكات
وفجأة يصاحبه صوتها
وهي بتزقزق وتطير
“تِذكر شو كِنت تقل لي..
مهما يصير..
انتظريني وضلك صلي..
الله كبير.”
وكإن حاله في الهوا
زي صوت فيروز
ولا هو محتاج الدوا
ولا يساوي صبره كنوز!
