شبابيك تكتبها حنان العسيلي

شبابيك
حنان العسيلي
.
شبابيك القلب المنسية
قافلة جدرانها على رسايل
لو فتحت مرة بتنهيدها
هتوزع لهفتها جدايل!
شباك شايل كلمة في سره
ونسيم مش عارف يوصل له
ومابين شباك وجدار مدقوق
بيعافر ألف غروب وشروق
بس الشباك رافض إنه
مرة يفتح ويشوف النور
أو حتى رافض يوصل له
سهم وقلبين
من فوق السور
شايل مواعيده ورسايله
بيعِدّ دموعه على مهله
يعزف أناته في غنا عصفور!
يقرأ مأساته في أحلامه
حابس أحلامه في أعلى قصور!
ومابين أمله ومابين يأسه
نَص معاهدة مش بيخالفه
لكن ممكن جدًا يهدا
يهرب من مستقبله لو شايفه!
دايمًا متلخبط متوتر
شايل جوا رسايله حنين عارفه
لكن مش قادر يتصور
إنه يفتح ويشوف الكون!
أو إن كلامه هيعبر
عن حل للغز دموع وشجون
ولو نجح إنه يعبر عنها
تفتح جدرانه في قلبه عيون.