الزاوية بتفرق في الصورة
حنان العسيلي
الزاوية بتفرق في الصورة
بتغير في ملامح ضحكة
لو كانت تايهة ومكسورة
يمكن حتى تداري الدمعة
وتحول تفاصيل أوجاعنا
لملامح راضية ومسرورة
تلمس نبض في قلبك
يبكي
تصرخ بحطام صوت
متخبي
تهرب من نفسك
قدام زووم”zoom”
ثابت في مبادئك
في التصوير
حزني لنفسي
والبسمة للناس
دي ضرورة!
وكأنك واقف بتحاضر
بتترجم وجعك بالتفاصيل
معكوسة
في خطوط سبورة!
هو الإحساس ملكك وحدك؟!
وألا الموضوع بينكم شورى؟!
هتطبطب على نفسك إمتى؟!
وتبطل تمثيل البهجة؟!
مسكينة دموعك مسجونة
وملامحك بتحاول تهرب
ما تلومش بقايا الصدق
في روح
بتلملم نبضها وتغادر
من ضحكة زيف فيك
مشهورة!
مقهورة الدقة اللي
في قلبك
لما تشد إيديها وتهرب
وتغادر تفاصيل الزاوية
معذورة ومليون معذورة!
