محمد ظريف يكتب الصورة المهجورة

الصورة المهجورة
بتاعة حلمي زمان
والباينة طشاش
من حارة درب النسيان
برواز متعلق في الخيط
وبيشبه حب الرمان
كل الشخابيط اللي في قلبه
بتزود حالة التوهان
بالليل تتلم العفاريت
وتفضي البيت العمران
وف حضرة كل التوابيت
الأسود ديما” كسبان
مسكين بخبط ع الحيط
ويفرفط زي الغرقان
في معاده نفس التوقيت
بيصحي القلب النعسان
علي شط بحور الحواديت
بيعوض نقص وحرمان
مش قصة خاتم وخطوبة
ولا عقد مرصص مرجان
مقرية الصورة ومحسوبة
علي دقة قلبي الغلبان
واكمنك يعني مرغوبة
قالو بطلك لازم يتهان
والناقة الحمرا المطلوبة
والساكنه ف قصر النعمان
دهاليز مبنية ومخلوقة
مخصوص لمزاج السلطان
ولاحدش يقدر يوصلها
حتي اللي معاه العنوان