إبراهيم جمال يكتب اللقا في الحلم

كل اللقا في الحلم
ميشبعش
والحضن لو بالعين
اكيد مبيكفيش
والشمس في عيوني
دبلانه مبتلمعش
لو كنت يوم محتاج
لايدين ما بتساعنيش
والليل برئ م الدمع والحيرة
احنا اللي روحنا متعشمة في النور
كان ليا صاحبي ف سكتي ماشي
خاف قلبي منه يوم ما نط السور
واختار طريق عكس البشر والناس
واختار يكون وحده… والوحدة ما تعديش.
وانا اللي باشبه في الشوارع الضلمة
لمبة من النيون
نورها ضعيف ف البرد
لكنها قادرة
تهدي الحياري في التوهة والعتمة
وقادرة توهب للشارع الميت
علامات وجود
عيني اللي دبلانة م الفراق
تشبه سحاب خايف يضم سحاب
لاحسن ف وقت الضم تبكي
قلبي اللي دقاته بتعلن الاحتضار
يشبه نهار تايه مابين امله
ف ساعة نشوة من قبل الغروب
وبين خوفه في نشوته يدبل
عمري اللي ضيعته في اكتشاف الناس
يشبه لعقد من الخرز مقطوع
وواحدة واحدة حبات الخرز تهرب
بلا مرسي ولا امل ف رجوع
وانا اللي باشبه في الحياة نفسي
وانا اللي خايف لاصبح ما بشبهنيش.
واتوه عني عشان طمعان
اني اتوه
لكن
التوهة ما تاخدنيشن.