إبراهيم جمال يكتب سواقي العمر

وتدور سواقي العمر بالايام
تسقي اللي فات بالحنين والشوق
تسقينا خوف م الي جاي قدام
تزرع امل يمكن يطرحلنا بشروق
وازاي هاخاف منك
وانتي البلاد والبيت
وازاي هاغير فيا اشواقي
وازاي هاسلم للي باعوا
الناس
وباعوا دمي واهلي واشلائي
وازاي هاجاوب ع السؤال
ب ازاي
وانتي الجميلة ف قصر عاج
وياقوت
سورك حجر مارد اقوي من الفيضان
والحرس خونة
والحكم للخاينين
بادعي يجوز تقبلي الغفران
وتحني يمكن حبة ع المساكين
وتجاوبي عن معني الوطن بخطاب
ما يكونش كاتبه غير فؤاد مشتاق
للصحبة والغنوة وللمة الميادين
ما يكونش فيه معني الا الحنين للنور
طالل بعين حفنة بشر مساجين
بادعي يجوز نتلم من تاني
واغزل بدمي ف الرمال بساتين
وان كنتي خايفه الليل يطول
او يتوه فينا النهار
فاسجنيني جوا قلبك
طولي وقت الحصار
واهزمي خوفك بموتي
وافرحي بلحن انتصار
غني فيه كل اللي ماتوا
ان كل اليأس عار
وان كنتي محتاجه لمحبة
فازرعي ف الارض حبة
واهتفي فينا نثور
نسقي ارض الغيط بدم
تطرحي ورد وخضار
#حبة_امل
#شظايا
#جديد