جـراحـي يكتب .. (عُمر الضّـي)

أنا ضلك الوارف
عارف أكيد عارف
جايين منين و لفين
من فوق جبين النور
حاضن انا المستور
مادد دراعي سبيل
ضلي أكيد ضلك
غايب و برجعلك
و الليل يزيدني حنين
مع كل طلعة فجر
بخلع عباية الهجر
و ارجع مع العاشقين
شمسك علي نيلك
تشرق تغنيلك
أغنية الساكتين
واقف مع جبالك
و بغني موالك
فليسقط الخاينين
و دخلت انا بحرك
و خطفني انا سحرك
و بناتك الحلوين
لكن يروح النهار
و انا كل مـٰديٰ انهار
و يلمني ليلك
أتخبي في توبك
قدري و مكتوبك
أدوب في تراحيلك
استني ضي الفجر
يرجع كليلة قدر
و ارجع اغنيلك
امد لك ضلي
هو اللي فاضلّي
مع صوت صهيل خيلك
يا بلادي يا غاليه
رموكي ليه في الطل
روحي جبال عاليه
راميه عليكي الضل
حبسوكي ياما في ضلمه
و استحلوا لحم الحي
لو عشقوا فيكي الليل
انا عُمري عُمر الضي