جـراحـي يكتب .. (الآخره للغلبانين)
النص:
أنا ليل و شمسه انطفت
و مفيش أمل للفجر
لو حتي طال اللُقـا
جاي بعد منه الهجر
الوحده ونسي و أُنسي
لو حتي وسط الناس
عايش مع الدنيا منسي
و بالجــزم منداس
و بعد ثورة كرامه
و بعد نورها الجميل
غنولي يلا السلامه
و رجعوا بينا لـ ليل
يخطفنا من وسط ناسنا
و يملي بينا السجون
و يدس سمه في راسنا
و يصيب عقولنا بجنون
و نثور عشان العداله
يضرب رصاص في العيون
و يسوق معانا النداله
يحرقنا نِـتْيْ و بَـنـون
و اما طالبت بحقوقي
و وقفت وقفة تضامن
زاد النظام من حروقي
و دي عاده من كل ظالم
و اما خطفت بدراعي
حقي اللي واخدينه مني
خلوني لص في محاكم
و فــ كعب داير ياخدني
شوفت البلاد انفرادي
مليان يا سجن الغلابه
كل اللي غنا.. بلادي
محطوط طعام للديابه
صوتك في سجن الكلام
عالي و معدي الحواجز
ايه يعني جسمك ينام
الفكره نور فينا نافذ
يا ثوره ماتت ما لحقت
البطن لسـاها قادره
و مسيرها تحبل و تولد
ملايين بتهتف و ثايره
تبني بلادنا الحزينه
و تحرر المسجونين
لو حتي دنيتنا خانت
الآخـره للغلبانين
