جــراحـي يكتب ( كبرت تانـي )

.
كنت بــكْـبر كل مده و ..
فين و فين
بتعدي ع الوش السنين زي الحنين
و بعد حبه كبرت تاني حبتين
و بقيت اعجز حبه حبه و ..
قلت زين
مش مشكله ..
لو شعري أبيض سِنِــتين
و بعد حبه بسرعه جداً
شِـبت تاني
بقيت احس إن الزمان ده مش زماني
بصيت لنفسي في المرايه و قلت مين!
أبو شعر طيَّـر من كلاكيع السنين
اقتنعت ان العجوز جوه المرايا يبقي انا
لو حتي عمري ساعتها …
كان عشرين
و شويه تانيين عَـدُوا عَـدْواً
زي مُهره طَلوقَه
روحها عنيده جـداً
انقلاب جه بعد ثوره
كات مغامره أَم مؤامره
اتلغت فيها الثوابت
كلنا روحنا فـ مغامره
اللي كان عامل مجاهد
فجأه طلعت …
– رايته – حمره
و اللي كان عامل حسابه
إنه يفتح..
سَـك بابُـه
و الحبيب مبقتش فارقه
بين حضوره او غيابه
أما شكلي ..،
من ساعتها نويت اصاحبه
وش عَـجّـز.. جلد كَـرمِـش
كل شيء راح يِقْـضِي نَـحْبُـه
كل يوم أضحك لنفسي
شيء جديد و لابد أحبه
شعري شايب .. شعري طَـيَّـر
كله عادي .. كله منظر
كام سنه و العمر ماشي
المهم يكون له جَـوْهَـر
بعد حبه يا أحبـه
لما اموت و ده عن قريب
لو هتنسوا، إوعوا تنسوا
اني عشت كتير غريب
اللي شافني مره طيب
بعد منها شافني ديـب
و اللي خاف مني و هجرني
بعد حبه بقيت حبيب
و الصراحه، كنت صادق
كنت بتقبل غرابتي
يوم معافر، يوم مضايق
يوم مريض ملقتش طبي
يوم حمامه جوه حَضْـرَه
يوم شيطان و طردني ربي
بس عمري ما كنت خاين
زي ناس حلفت بــ حُبـي!!