جـراحـي يكتب ( مش بهيـه)
انا عين الطلبه السهرانه
و ايدين الناس الشقيانه
انا قدم الخلق التعبانه
فوق اسفلتك م الصبحيه
انا قلب الام المكلومه
و كفوف الاب المغلوله
انا دم عيالنا المقتوله
علي ايد عشماوي الداخليه
انا طيف ساير تحت نخيلك
ميت عطشان فـ شطوط نيلك
يخونوكي الناس و بغنيلك
يا ام طرحه و جلابـيه
ضحكتك كات ليا زاد
زي حبَّـيـبَـه ف معاد
يا احلي من كل البنات
يا بلدنا يا بهيه
بس ليلك فجأه طال
و اما بيطول المطال
خوفنا من ذل السؤال
خدنا من بلوي لـ رزيَـه
و انتي صميتي ودانك
لما صوتنا طلع و دانك
بتبيعينا للي خانك
و احنا أحرار مش مطيه
يبقي كان لازم يكون
صوت مبيخافش السجون
قلب ميهابش المنون
يحيي من تاني القضيه
العدو زمان كان خواجه
النهارده لبس بياده
داس علينا مسابش حاجه
بس برضه الشمس جايه
نور مسيره يبيد نيرانهم
و الحق شمس تصول ف ليلهم
و اللي مات ورا سور سجونهم
اسمه دمعه من عنيا
كنت و انا عيل بحبك
حالا ادعي تقضي نَحْبِك
عمري ما ارجع يوم اصاحبك
ياللي مطلعتيش بهيه
جريدة الفكر الحر 