محمد جراحــي يكتب ( عروسة النيل )


محمد جراحــي يكتب ( عروسة النيل )

في عز الليل
خرجت اتمشي جمب النيل
في طرح البحر زارعين الأراضي سبيل
و أول ما العِـشا تِـدّن
محدش يمشي نواحيها
انـا و جنوني لم نقبل
كلام الناس و حكاويها
و خدني الليل …
في عــز الليل …
في برد الليل …
و خدني هناك و لفلفني
و شال جدي علي كتافي
مشيت و الخطوه تخطفني
لنجمة بتِضوي و تلالي
علي الشط اللي بان قبلي
جميله هناك موعداني
و صوتها الهادي يندهلي
أرد ينادي من تاني ،
و صوت النيل …
و حضن النيل …
و ضي النيل …
رميت بكياني للميه
و خدت النيل ف أحضاني
أعوم و ابوسه بإديا
حبيبتي هناك موعداني
تفرحني و تحضنّـي
و تقبل عقلي و جناني
و انا أشيلها و اغنيلها
و اعيش ليها و تهواني
و فجأه لقيت …
شطوطها بعيد …
و صوتها بعيد …
و نورها بعيد …
في نص النيل انا راضي
بــدوامه بتبلعني
سمعت ابويا بينادي
بقول بدري عليك يابني
عروسة النيل بتحضني
لـبطن النيل بتسرقني
إيديها ملفلفه صدري
و رجليها علي رجلي
بتاخدني تفرجني
علي بيتنا و تهمسلي
هتبقي أمير …
عريس النيل …
في حضن النيل …
و ابويا لسه كان واقف
لا هو فاهم و لا شايف
و بيشورلي و يعافر
بيـطوي الشط بدراعه
و عكازه علي الميه
كما موسي و اتباعُـه
و انا مشدود …
و ليلي يفوت …
في حضن النيل ،
عريس النيل
امير النيل …
و انا مشدود لجنيَـه
بترقصلي علي الميه
عيونها الحلوه عسليه
بتسحرني بملاغيَه
و ابويا بعيد
و صوته بعيد
و أرضه بعيد …،
رميت له نظره من عيني
انا مفارق يا نور عيني
و شافني بقلبه و اتحجر
مكانه و قال علي عيني
و شوفته و شالي كان جمبه
و مِسكه ف إيـدُه يِبْـكِـيني
و آخر حاجه كات بينـا
سلام لعيونه من عيني
سلام الروح …
هيام الروح …
غرام الروح …
عروستي الحلوه سحرتني
و باب بيتنا عليه اسمي
نزلت معاها و خدتني
و خلتني أسيب جسمي
و أروح بالروح
و اعيش بالروح
أعيش …. بالروح

1 Comment

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.