نهاد كراره تكتب
طال الطريق
طال الطريق وزادي فيه قلبي الحزين
شايل همومي ووحدتي ووردتين
أحلام كتير زرعتها ليلة شتا
لما المطر جرف الزروع النابتة
بكت عيوني دمعتين
صرخ الزمن جوايا كفاياك دموع
كان أمتى الفرح زارك
عشان تبكيه ياحزين
هل مرة كملت الأحلام في قلبك؟!
اسكت بقى
كفاياك بكا وأنين
خلعت كعوبي
اللي كانو محنيين
الوقتي دابت لف في الدنيا الهالكة
و ادتها للفضا
مش عاوز أدور تاني ع اللي راح
ولا استنى اللي جاي ولا انقضى
أنا هنزرع هنا
شجرة بكا منبته دموع الرضا
واللي هيسألني بطلت السعي ليه
هسمعه صوت الموت في العروق النابضة
أنا شجرة ماتت من سنين
ايه اللي يغري تموتها تاني؟
ارحل بعيد عن سكتي
يا أي غدار أناني
الليل سكنته
والصبح لما بيطلع بينساني
ليه لسكة الأحلام
أعيد تاني؟
طال الطريق وخلص زادي
وانكسر القلب اللي كان زوادي
نظرتي للعمر اللي راح
زي انكسارنا مابين عنادك وعنادي
خلص الطريق
وأنت وأنا ساحل ووادي
بينا جبل بنيته أنت
و انتظرتك تحفره
لكن قلبي اللي شاري
بعته بالرخيص وقلبك هادي
جريدة الفكر الحر 
لن ادخل للتفاصيل كلمات حزينه منكسرة تأثيرها يشعرك بالوحده والفراغ وكانك موضوع ضمن زاوية لن تستطيع الخروج منهم
جميل جدا ورائع جداً شكرا لك
إعجابإعجاب
ماشاءالله جميل جداً تسلم روحك أستاذة نهاد
إعجابإعجاب