صفاء المنطاوي تكتب هي دنيا


صفاء المنطاوي تكتب هي دنيا مفيش حاجة فيها دايمة

نفسي قلبي يرجع زي زمان
قبل ما يتعلق ويحب
قبل ما يسكنه الغريب
ويملاه شجن وحزن

نفسي يتولد من بكرة
وأرجع تاني طفلة

نفسي أرجع تاني أنا
وضحكتي م القلب

نفسي تختفي العلل
وبن عمها الاكتئاب

نفسي ألقىٰ نفسي
اللي ضاعت من سنين

نفسي في ذكرى حلوة
بس أجبها منين

نفسي أرضى و أعيش
بدل ما هو كله تمثيل

نفسي في حياة مستقرة
بدل الخوف والذعر

نفسي أحط راسي ع المخدة
أروح اوام في النوم

نفسي مهما قابلت من مصايب
ألاقي نفسي مش بحس
وكل حاجة تحصل أبقى هادية
مخُدش كل حاجة ع الأعصاب

كنت ونا صغيرة نفسي أكبر
ودلوقتي ندمت
كنت فاكرة نفسي شايلة الهم
آتاريني كنت في نعمه وانا مش حاسة

ماهو كل ده قلة خبرة
ومحدش علمني يعني ايه دنيا
يعني ايه مسئولية
وأنك تبقى كبير

مش قصدي بس السن
القدوة والمثل الأعلى هم الأهم
انك تبقى ماشي ع الحبل
وف نفس الوقت محافظ ع التوازن

علشان غيرك مُلزم منك
مينفعش تبقى قائد ملوش أي ستين لازمة
غير أنه بيدمر ويهد
شخص ضعيف طب إزاى هيحل

هي دنيا مفيش حاجة فيها دايمة
حتى الحبايب كلهم رايحين
والمشاعر كل ساعة بحال
والقرب مبقاش هو المقياس

والنفوس بقت نافرة
واللي ع الوش من ضحكة صفرة
غير اللي انكتب في الدم

بيلف دورة كاملة يملىٰ جوانا حقد
كل حاسة م الحواس أخدت اللي فيه النصيب
وفي الآخر تلاقى حب النفس
وللاسف النفس أمارة بالسوء
واحنا فاكرين اننا قداس

ياه ع الدنيا ياريتها تستاهل
حتى احنا في يوم هنسبها
ولو حد افتكر واترحم علينا
يبقى كتر خيره أنه لسه عنده حس

ماهي كل كام سنة بتآخدنا حتى منا
كأننا في سباق تخلينا زي لعبة الشطرنج
تحركنا كيفما تشاء وأحنا فرحانين كأننا أسياد
واحنا أصلا مجرد عبيد للرغبة وكلنا فاكرين العكس

نفسى بس نصحى قبل ما يفوت الأوان
نفسي الآخرة هي اللي تسرقنا على الأقل ذنوبنا تخف
والميزان يتعدل والواحد قلبه يهدى مهما قابل من صعاب
ديما نقول قدر الله وماشاء فعل ونحمد ونشكر كمان
الحمد والشكر لك يارب رغم ضعف القلب وقلة العقل ساعات.

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.