جراحـي يكتب ( دهمشأنـا )
.
كنت عيل امتي يعني!
من و انا صغير كده
محطوط ف خانة الكبار
و اياك و عيب تعمل كده
مستوايا ف المذاكره
كان ضعيف من غير كسوف
مكنتش اعرف تفرق ايه
الاسم نعجه أم خروف
و برضه حطوني في خانة
العباقره و اللي بيحبوا الدروس
ضغط عالي فوق كتافي
و الكتاف رفضت تشيل
روحت ملعب كوره اهرب
وقفت جول و قالولي شيل
صديت و شلت و كنت جامد
قاموا عملوني الكبير
و برضه حطوني ف خانة
المهاجم الخطير
رجعت بيتنا كنت فاصل
اللي بـحصل ده كتير
انا لسه عيل ع الحاجات دي
عايز اقاوح ناس كتير
طلعت ورق ابيض و غامق
قولت هارسم كل شيء
رسمت تفاحه و ازازه
كله كان تخطيط برئ
و جيت ف حته رسمت قطه
و بعدها مركب غريق
شافوني قاعد جوه اوضتي
و الورق ملو الحيطان
حطوني تاني جوه خانه
و قالوا فن ملان جنان
و كبروني عالمقاوحه
و شيلوني هموم كمان
ارسم عن اللي مقهورين
و المسجونين خلف الحيطان
اكتب عن اللي اكل عيشهم
سارقه مسئول مش تمام
ذاكر عشان واحد ف سنك
لازم يركز في الكلام
الضغط عالي فوق كتافي
و الكتاف رفضت تشيل
و انا عقل عيل قلب عيل
لسه معرفلوش سبيل
هربت منهم للمرايا
بـابص فيها لقيت قتيل
عيل معجز شعره طيّـر
دقنه شايبه و ناشفه خيش
مدهونه عينه ضل اسمر
و عمره ما اتعاطي الحشيش
مين اللي واقف في المرايا؟!
أنـا مَسخ عيّـل كان ظريف…
جريدة الفكر الحر 