نبدأ كلامنا اللي طالع
من بين ضلوعي أنين
بالبسمله و الدعـا
و بـشوق لسيدنا الزين
الاوله اه
ضحكايه مُره فـ نكته لم تنتهي
و التانيه اه
نشفت بحور الحب و المغنيٰ
و التالته
محتار أطاوع قلبي و لا العين
الأوله عمري و التانيه وحدتي و التالته علي فين
يا مهجر العاشقين ..
خلوني وياكم
و قولولي مين ذلكم
و ع الجويٰ رماكم
ده انا اللي بدر الوصال
و دفعت بالغالي
و رويت غيطان الغرام
طلع الشجر عالي
و لما طرحت محبه،
ما جنيت سوي أساكم
الـود علّاكم !!
و لا الفراق مكتوب
يا حب جوه قلوب
حالف لَــ تفضحنا
تطلع فِـ ضي عيون
لعيون بتجرحنا
و تخلي منا طيور
ف ايدين بتدبحنا
و يبقي لينا بلاد
نلقاك تسوحنا
ورا ناس بلادها بعيد
نفضل نلف ندُور
يعشمونا بـ عيد
نتقب ودان شوقنا
ييجي المعاد بـبعاد
م الحزن لم فوقنا
و تبان دموع السهاد
زي الرايات فوقنا
نلبس شيلان انكسارنا
و نرضي بالمكتوب
الأوله آه و التانيه آه و التالته المكتوب
ياما كسينا الناس
و سابونا من غير توب
جريدة الفكر الحر 