محمد جـراحـي يكتب – ألـوان –
أسود يا ضل الجدار و لا الجدار غامق
عاشوا الغلابه و ماتوا، و الله ماهو فارق
عاشوا الملوك ع الموت و احنا نموت م الهم
أزرق يا دخان السيجارة يا منسي عقلي الوجع
إيه يعني كل اما افوق، أسكر و اقول انا جدع
توب الندامـه طويــل.. و ديله لم يتلم
أحمر يا ليل الغُـناي، بالعِـند في القمره
أحمر يا خشب المواقد، شايَك كما الخمره
و الفرق بين ليل و ليل، فرق النبِيت مِ الدم
أخضر يا عين البنَيَــه علي وش لون النيل
زقزق و شاور عليا و انا جزع مايل ميل
ليه الفرص لما تيجي بتجيب معاها الغم
أبيض يا جِيـد شال و حمّل كام عقد لولي و زبرجد
لَـفينـها حراس في ليلـها، و يدوبوا لو بوسه طلّت
الصبر طيب و بــنْفَـع، بس المناغشه أهم
ألوان و جايـز شايفها و العيــن بتعمل بصيره
و العيشه لونها مخاصمها، و الروح أسيره و كسيره
إيه يعني مات المسافر، يـامـا السكك بـتلِم
لون اللي راكب ده كاكي و لون اللي مركوب غميق
مركب و مليان صواري، عمره ما أنقذ غريـق
متنوحش علي قبري و اضحك، الفرح عندي أهم
جريدة الفكر الحر 