الأب فى عيد الأم
مقال ساخر
أيمن بدراوى
بابا …. !! بصوت آمر لا يخلو من الحزم سمعته يقولها
نعم يااستاذ حاتم خير؟!
عاوز 100 ج
ليه حبيبى
اجيب هديه لميس عبير !
ميس عبير بتاعة ايه؟
بتاعة الدراسات
مهمه اوى الدراسات دي
طبعا يابابا
حاضر!
بابا …. بنفس ذات الصوت
نعيم يا آنسة تقى
عاوزه 50 ج
ليه برضه
علشان اجيب هدية لميس ابتهال
وبتاعة ايه ميس انشراح دي؟
اسمها ابتهال يابابا!!!
حاضر ياستي ميس ازبهلال دي بتاعة ايه
بتاعة ال PE
افندم؟
Physical education
ويطلع ايه بقى الكريتيكال سيتواشن ده ؟
يابابا يعنى النشاط البدنى
العاب يعنى!
اه ياحبيبى
حبيبى ايه بس هو الالعاب دي بقى ليها حد وبيتجابله هديه ف عيد الام
طب ايه رأيك انتى واخوكي ممكن تشاركوا وتساهموا من مصروفكم
لا حبيبى البركه فيك!!
البركه فيا …. طب وطوابير الميسات والدادات دول برضه بركتهم فيا ؟
هو انا البركه طرحت فيا اوى كده
وفى الآخر اسمه عيد الام ؟
طب الاب ده موقعه ايه من الإعراب بس ؟ ….. ينقى ويفكر ويدور ويهتم ويدفع وفى الأخر ماما ياحلوه يا اجمل غنوة …. وست الحبايب …. وامى الحبيبه …. ويامايا ياما شدى الضفاير ضفريلى ….
ياعيني مفيش حد فكر يغنى للأب ولا يفتكره غير محمد هنيدي ف عندليب الدقى وياريتها غنوة عرفان الا كان كلها شحتفه ومين جاب بامبرز لحد ما فلس انااااااااااا …. وكمان داق اليع علشان تدوق المم! هي حصلت ياعم ايمن يابهجت …. ماشى ماشى
اه احنا كأبهات منفسنين طبعا وكلنا غل من جوانا لأن منطقتنا دون غيرها تقريبا لا تحتفل بيوم الأب ولا مسمع ولا حد يعرف بيه غالبا بيحتفل بيه العالم يوم 19 يونيو
وزي ماهو يوم 21-مارس طبعا غنى عن التعريف ده غير 12 مايو الى باقى العالم بيحتفل بيه غير يوم 8 مارس الى بيتحفل فيه بالمرأه عموما ….. وتيجي سيرة الراجل هس س س س صمت تام وصوت صرصور الحقل!!! وكمان مطالب بهدية ميس ابتهاج بتاعة ال بى إي الى هو فيزيكال ايديوكيشن …. ده احنا ف زمانا لو سمعنا الجمله دي هانفتكر انها حاجه ف الكيميا العضوية!!
بابا ….. انت بتكلم نفسك؟؟
انا …. لا خالص ياحبيبتى حاضر هاديلك ال 120 ج انتى واخوكي علشان هدية ميس فيزيكال بتاعة الابتهال اديوكيشن!
بابا ….!
جريدة الفكر الحر 