قمر رمضان تكتب “الستات مش محتاجه كتالوج”


 

“الستات مش محتاجه كتالوج”

“انتي نكديه ” .. ” انتي دماغك صغيره”…
جملتين بتعاني منها الستات في الدول العربيه عموما لكن هل هي حقيقه؟!!

الحقيقه ان الستات فعلا مش محتاجه كتالوج ولا تعتبر كائن معقد بالعكس ابسط من البساطه لكن المشكله ان الرجال هي اللي محتاجه تتعلم ازاي تفهم الست وتفهم تقلباتها المزاجيه .. بالضبط زي ما الراجل محتاج الواحده اللي تفهمه دايما وتفهم تعبه وزهقه وتقدره طيب ليه هما مش بيقدرو غيرهم؟؟ ..
………………………………….
واحد اعرفه بيمر بظروف صعبه شويه ومراته متحمله معاه المر قبل الحلو ومش بتشتكي لانها مقدره وحاسه بتعب جوزها .. جات في يوم من الايام هي تعبت نفسيا من كتر الضغوط والتراكمات جواها جه هو شافها كدا فضل ينتقدها ومقدرش تعبها نهائي ولا فاهمها ولما يجي يتكلم معاها وتبدا تعاتبه يقولها بكل بساطه انتي نكديه ودماغك صغيره ووو… الخ.. فا تضر تسكت وتكتم اكتر جواها لحين اشعار اخر …
…………………………………………………

واحده متجوزه جديد وعن حب سنين طويله وبعد ما رسم ليها حياه ورديه بينهم وان عيشتهم هتكون عسل وهيعوضها كل شيء في حياتها اكتشفت العكس للاسف وكل الاحلام والكلام طلعت اوهام ومن اول شهر جواز دبلت حرفيا وتعبت نفسيا وبتعاني من الارق والضعف ومشاكل كتير جدا بسبب اهمال جوزها ليها وبسبب صدمتها فيه وان الحقيقه اللي كانت خلف الستار مكنتش تعرفها ولا شافتها واتمنت لو يرجع بيها الزمن عشان تلحق نفسها وهو طبعا بما انه ” ضمن وجودها” معاه وخلاص بقت في بيته بقا يهملها ونسي حقوقها عليه ونسي الحب اللي بينهم وايامهم اللي راسمينها مع بعض ونسي كل حاجه ….
………………………………….

واحد بيقولي كنا بحب مراتي وكنا كويسين سوا جدا لحد ماحملت وكنت فرحان جدا اني هكون اب .. وان هنعيش احلي ايام حياتنا مع ابننا لكن للاسف طلع الواقع غير اللي راسمه في دماغي نهائي ومن بدايه حملها وهي تعبانه وكشوفات واشاعات وعلاج ومجرد ما البيبي جه اهتمامها بيا قل وكل اهتمامها بقا مع ابننا وبس .. بقيت بكره البيت بسبب الدوشه والعياط بقيت بهرب واخرج براحتي واسهر واقعد علي القهاوي واحيانا بكلم غيرها مش هنكر .. لاني مفتقد حجات كتير مبقتش لاقيها .. ومبقتش عارف اعمل ايه ….

………………………………………..
دول نموذج من ناس كتير حوالينا واراهن ان دي حكايا ناس كتير بتقرا مقالي دلوقتي بس نيجي نمسك المشكله واحده واحده ..

هنلاحظ ان دايما الراجل بيدور علي اللي يهتم بيه وانه يعيش حياته وانه بيزهق وبيتعب ومحتاج اللي يقدره .. *طيب ليه ميقولش لنفسه ان الانسانه اللي معايا دي كمان بتحس ويتزهق وبتتعب ؟؟؟

*ليه ميقدرهاش زي ماهو محتاجها تقدره ؟؟

*ليه ميحاولش يفهمها ويحتويها زي ماهو بيدور علي اللي يحتويه؟؟

  • طب ليه ميقولش لنفسه انا ممكن ادور بره علي اللي محتاجه طب هي اللي محتجاه ومش لقياه معايا هتلاقيه فين ؟ ممكن تخوني زي مابخونها مثلا ولا عشان هي بنت اصول هتفضل كاتمه جواها وعشان كدا هي تعبت ودبلت؟؟

.. “التعب النفسي بالذات بيقتل والله ياجماعه”

..ليه ميفهموش ان الست ابسط وارق مخلوق ومحتاجه فعلا اللي يعاملها كانها طفله مهما كان سنها ومهما كان مستواها محتاجه اللي يدللها ويحسسها انه فعلا اخدها من العالم كله عشان يبقا هو كل عالمها الخاص …

طب تعرف ….

الست مش عاوزه من جوزها او حبيبها غير الاهتمام فعلا ..

الاهتمام دا سحر رباني والله وبعتبره اكسيد الحياه ولو اهملته في علاقتك هتلاقي العلاقه بتموت ببطئ…

المشكله برضو ان معظم الرجاله مش بتعرف تهتم ازاي وشايفين ان الست محتاجه كتالوج خاص بالعكس والله انت بس خليك صاحبها وحبيبها واخوها وابوها قبل ماتكون جوزها …

بمعني …

*صاحبها اللي يحفظ سرها وبتفضفض معاه دايما حتا لو حجات تافهه جدا ..

*حبيبها اللي يعرف يحتويها دايما ويحسسها بالأمان ويشاركها ف كل حاجه بتحبها ويخرجها ويفسحها حتا لو هتتمشو سوا ف الشارع بدون اي هدف ومن غير اي مصاريف …

*اخوها وابوها اللي بيخافو عليها وبيحموها وسند وضهر ليها دايما وميسمحزش لمخلوق يضايقوها ويجو عليها..

..*محتاجه اللي يتحملها وقت تعبها ويحسسها انه جنبها ..

  • اللي يخاف عليها بجد ويصونها ويكون صريح معاها ويشاركها ف يومه ويحكيلها كل حاجه بصدق .. اهم حاجه الصدق والله ..
  • محتاجه اللي يفهم ان الست لما بتزعل وتضايق مش بتكون محتاجه غير الكلمه الحلوه والمعامله الحلوه صدقني وقتها هتنسا كل حاجه لما تراضيها باقل شئ وتطيب خاطرها ..

..يعني لما تكون زعلانه منك وتقولك مثلا متكلمنيش تاني وابعد عني تقوم مكلمها تاني وتقولها مقدرش ابعد ولا اقدر علي زعلك وتراضيها هتلاقيها ف ثانيه نسيت هي زعلانه ليه اصلا ….
لكن بعض النماذج من الرجال لو سمع كدا من الست بيقولها براحتك او انتي نكديه او يسيبها لوحدها من غير مايراضيها غيره وغيره وهنا بيقتل حجات كتير جدا في علاقته وهو مش حاسس…

الست كائن لطيف والله وبسيط جدا محتاجه بس اللي يفهمها صح عشان يقدر يعيش معاها صح
وعشان كده ربنا قال في كتابه قوله تعالى : (الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ…… )(النساء:34)

” افهمو بعض صح عشان تعرفو تعيشو صح”

 

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.