ازاي تتخلص من صفاتك السلبية ؟

انا مش هعرف ، انا مقدرش ، انا فاشل، انا مش كويس ، انا عصبي ، انا كسول
وآلاف من الكلمات الشبيهه اللي بتوصف بيها نفسك واللي بالفعل بتخلي كل حاجه متعلقه بالوصف ده تحصلك بالحرف
بس هل انت فعلا كده ؟؟
في الحقيقة كل دي ما هي الا قناعات سلبية خاطئة مترسخة جوا عقلك اللاوعي
اتسربت ودخلت واتخزنت جواه في وقت من الاوقات
ممكن وانت طفل حد وصفك بنفس الوصف
او شفت شخص ما في موقف ما اتصرف تصرف شبيه فالعقل اللاوعي سجل المعلومه زي ما شافها و ان كل المواقف المشابهه هو ده التصرف اللي هيصدر فيها
بشكل او بأخر فيه قناعه اتزرعت جوا عقلك اللاوعي بإنك فعلاً كدة وبناء على القناعه دي انت بتتصرف
لكنك في الأصل مكنتش كدة ومتولدش كده
في علم النفس دي حاجه اسمها #العجزالمكتسب
يعني ايه ؟
يعني انت عاجز عن التصرف الايجابي في الموقف ده لانك مصدق انك متعرفش اومتقدرش او انك كسول ……الخ
انت مصدق عن نفسك صفه سلبيه معينه والصفه دي مكنتش اصلاً فيك
عقلك اللاوعي اكتسبها نتيجة لموقف او معلومه اتعرضتلها
اللاوعي مقتنع تماماً بالقناعة اللي اتزرعت جواه وطبيعي جداً يدي اشارات للعقل الواعي انه يتصرف بناء عليها
انسب طريقه تخلصك من القناعات السلبيه دي
هو انك تستبدلها بعكسها الايجابي وتحفظه للاوعي
زي ما حفظ القناعة السلبيه وصدقها وأمن بيها
نقدر نزحزحها وندخل مكانها القناعة الجديدة
بس ده محتاج منك تدريب كتير وصبر واصرار
لو عايز تساعد نفسك فعلاَ وتتخلص من الصفات السلبية دي خد القرار وابدأ في التنفيذ
▪اول خطوه هي انك ترصد القناعة السلبية
شوف ايه الكلمات السلبية اللي انت بترددها عن نفسك معظم الوقت
او لاحظ نفسك ومشاعرك في المواقف المختلفه وبالذات المواقف اللي بتضايقك ركز مع مشاعرك في الاوقات دي وشوف ايه الأفكار اللي بتخطر في بالك وقتها
▪حط لكل ده بدايل ايجابيه واكتبهم عندك
بصيغة انا كذا
انا ناجح
انا كويس
انا بعرف
انا بقدر ……الخ
▪بعد كده ابدأ اعمل خطة الازالة والبناء
ازالة القناعه القديمة وبناء القناعة الجديدة جواك
•شوف القناعة الجديدة اللي انت عايز تزرعها جواك طلعت ايه وابدأ اقرأ او اسمع عنها كل يوم معلومه
•اكتبها عندك وكررها ورددها يومياً مئات المرات كأنها واجب يومي عليك حفظه وتسميعه كل يوم بلا انقطاع
•اكتبها في اماكن ظاهرة ليك دايماً بحيث تلاقيها حواليك في كل حتة
•تخيل نفسك كتير وانت بتتصرف تصرفات بناء على القناعة الايجابية دي
وانت ناجح مثلا او انت بتعرف تواجه او انت بتتعامل مع المواقف المزعجه بهدوء بدون عصبية ……الخ
•والأهم هو المداومة والاستمرار على الحجات دي يوميا وبدون انقطاع نهائى
كل ده بالتدريج هيسرب القناعه الجديدة جواك من غير ما تحس زي ما القديمة دخلت اصلاً من غير ما تحس
•طيب امتى هتعرف ان خططك نجحت؟
المفروض ان القناعة الجديدة لما تبدأ تتسرب للاوعي بدل القديمة يبدأ اللاوعي يدي اشارات للواعي انه يتصرف بناء عليها
فهتعرف ان خططك نجحت ازاي؟
لما تلاقي نفسك بدأت تتصرف تصرفات عكس تصرفاتك القديمة
يعني لو قناعتك كانت العصبية مثلاً بدأت تلاحظ على نفسك انك بقيت اقل انفعالاً
لو قناعتك كانت الكسل بدأت تلاحظ انك بقيت انشط شوية
لو قناعتك كانت انك مبتعرفش تواجه الناس بدأت تلاحظ ان فيه مواقف عرفت فيها تواجه
وهكذا …..
▪خليك صبور لأن الموضوع هياخد وقت وهتلاحظه بعد مدة بالتدريج
عشان تزحزح قناعه سلبيه مترسخه من سنين في اللاوعي وتحط مكانها قناعة ايجابية ده مش هيحصل في يوم وليلة
ده هيحصل بالمداومة وبالتدريج وبالاراده والاصرار
اللي اتزرع جواك في سنين مش هيتغير في يوم
خليك مؤمن انك هتعرف وهتقدر
محدش يقدر يساعدك لو انت مش عايز تساعد نفسك
ساعد نفسك لأن#نفسكتستحق
ايمان عبيد