دلوقتي
هيموت الوتر
وهتسكت الالحان
وتخاف نوتات النغم
تلعب علي الاحزان
ويخاف حماة الوطن
من ثورة الانسان.
دلوقتي
بعد الصبح ما شق الجبين
وخطا عتب الخوف
والشمس طالعة بالضيا
بتطمن الملهوف
دلوقتي نقدر نفترق
ونقول فراقنا ظروف.
دلوقتي تحديدًا
هاخاف اكتب بيوت الشعر
واخاف الوزن يتكسر
واخاف قلبي من الوحدة
يقف في النص متحسر
واقول
مش كان يجوز العفو
مش كان يجوز نرجع
ويرد عقلي بحكمته
لا…
ويزق قلبي بصرخته زقه
يرجع يشوف الصورة
من كدر الحياة
وتبان سجون
اكبر من الثورة
وابان ضعيف الصف والعدة
والجيش بيدخل حرب ومناورة
وانا قلبي ثابت برضو من مدة
يضرب
تزيد الصرخة والهتافات
وابكي
واخاف م الحلم ده بالذات
لو يتقلب ضدي
واسيب ايدك بخوف واضح
تسيبي الايد
ومتقاوميش
واعيش علشان نصيبي اعيش
واموت علشان خنوع الجيش
وسلطة الحكام
واسيب الشعر
واسيب روحي
واحاول يمكن ارجع خام
فاعود وحدي
واموت وحدي
واعيش وحدي
بلا اوتار تعدي الوقت ويايا
ولا انغام
جريدة الفكر الحر 