جـراحـي يكتب – حبيبي – ( إن كان الوطن حبيبا تراسله سجينات الرأي)

جـراحـي يكتب – حبيبي –

( إن كان الوطن حبيبا تراسله سجينات الرأي)

و عامل إيه يا روح قلبي و كيف حالك
خطفت سنيني و رميتني في أوحالك

أنا صابرة و مش بقدر
أشيلك من حكاياتي
كتبت كتير كلام آسي في جواباتي
اعاتبك فيها ع اللي عملته في حياتي
اشد الورقه م الدفتر
و اقول تاني : تحياتي…،

صباحك ورد لو جالك جوابي الصبح
مساك أطيب لو المكتوب وصل بالليل
برغم اني كما القربان .. ساقوه للدبح
لكن طيفك مصبرني علي التراحيل

حبيبي ..،

أيوه حبيبى رغم السجن و السجان
خدوني عشان
عشقت عينيك و حبيتك
قالولي انك هربت و سيبتني و جبان !
و فاكرين اني هتغير
و اخون بيتك!
و لا يهمك يا روح قلبي،
ميعرفونيش
و لا عقولهم هتفهم
يعني ايه عاشق
غرامك ليا أوطان
روحي فيها تعيش
بلاد الناس تروح أو تيجي
مش فارق
و ايه يعني أعيش السجن لاجل هواك
و هو السجن علشانك .. هيعمل إيه!
حبيبي انت ؛
و قلبي في الهوي مأواك
و إيه في الدنيا بعد هواك انا ابكي عليه!

حبيبي ..

سلام دلوقت من قلبي
و من روحي و من عيني
نَـفوك عني في وطن مجروح
لكنك جوه تَـكويني
و حبسوني بعيد عنك
عشان عاوزاك وطن أحسن
و عاوزيني أموت و أحزن
و انا شايفاك بتؤذيني
و دي نارك صحيح.. لكن..
كفوف نيلك بـتِرويـني.