محمد كمال يكتب: الطعنة.

محمد كمال يكتب: الطعنة.
“الطعنة”
خطرتلي الفكرة لما سيد بعتلي على الواتس يقول: “محمود، قررت أعمل في حازم صاحبي مقلب موت، هو حرفيًا مقلب موت، بموت مالضحك بمجرد ما بتخيل شكله وهو مرعوب ها ها ها.. مش قادر. عارف هعمل أيه؟ شوفت فيلم “سكريم”؟ مش مشكلة، أنا هعمل زي الواد اللي كان لابس قناع مخيف وبيقتل في الناس، اخترت الشكل ده عشان حازم صاحبي اتفرج على الفيلم ده وعارفه”. سألته وهتجيب اللبس اللي هتعمل بيه المقلب منين؟ فقالي: “أعرف محل بيبيع الحاجات دي، هو بعيد شوية بس مش مشكلة.”
ومن هنا الشيطان ابتدى يلعب بعقلي، صدقني يا باشا كأن مش أنا اللي كنت بفكر.
– كَمّل. قال أحمد بيه، الضابط المكلف بالقضية.
قلت لسيد صاحبي وانا بضحك ضحك من ورا قلبي: “ها ها ها.. دي هتبقى حاجة مسلية خالص يا ابوالسيد، بس يا خسارة مش هشوفها.. أه.. بالله عليك صورها.”
– سكِت ليه؟ كَمّل.
كان سيد وصفلي المحل فين، بعد ما سألته على مكانه عشان حبيت الفكرة ولو حبيت أعملها في حد يعني. طبعًا كنت بكدب عليه. المهم.. رحت للراجل وقولتله فيه واحد مواصفاته كذا جالك أخد منك هدوم وقناع؟ قال اه. قولتله عايز زيهم بالظبط، ولمّا حسيت الراجل استغرب كده، قولتله هو حب يلعب لعبة معايا بس انا هقلبها عليه.
– امممم.
الراجل طبعًا مش فارق معاه كل ده.. المهم يبيع.
– انجز يا ابني، قتلتهم ازاي؟

كانت الساعة 11 بالليل، والناس في الأرياف بتنام بدري، ممكن يكونوا صاحيين أدام الشاشة مثلاً، لكن الشوارع بتبقى فاضية والدنيا هُس. قربت من بيت سيد صاحبي وبشويش عديت من فوق سور الحوش بتاعهم الواطي، طبعًا حافظ بيتهم حِتة حِتة، وبعدين روح…
– هات يا ابني القهوة.. كَمّل انت.
وبعدين روحت مغير هدومي ولابس اللبس اللي جبته من الراجل وحاطط القناع. ولأن الدنيا كانت هادية خالص، كنت سامع صوت سيد وحازم في الصالة، قربت من البيت بشويش أوي، ولأن برضه الجو كان حر أوي، كان سيد فاتح أغلب الشبابيك. أه.. نسيت أقولك يا باشا إن بيت سيد صاحبي في حِتة مقطوعة كمان، منعزل كده شوية عن بيوت البلد، يعني ولا فيه جيران ولا حد هيكون معدي ويسمع حاجة، ودا اللي خلاني واثق إن خطتي هتنجح.
– انت تقرب لمحمود المليجي يا ابني؟ يخرب بيت شيطانك! كَمّل.
الحوش كان ضلمة أوي ومزروع فيه شجر محاوط البيت، فكنت عامل حسابي إني أستخبى فوق شجرة منهم لو حد حس بيا، لكن فجأة أصواتهم اللي كانت واصلاني سكتت خالص، شكيت، وقلبي اتقبض مع إني مبخافش، ولمّا سمعت صوت جاي من ورا البيت قصادي من الناحية التانية عديت بشويش من شباك أوضة من الأوض واستخبيت، البيت كله ضلمة مفيش غير الصالة هي اللي منورة، بصيت للحوش من الشباك وانا مستخبي ورا تربيزة، لقيت شبح معدي، بس قدرت ألمح وشه اللي مكانش وشه طبعًا، كان حد حاطط نفس القناع اللي انا حاطه.
– استنى.. يا محمد بيه.. تعالى.
وهكذا نادى أحمد بيه على زميله، تقريبًا خاف من نظرة الشر التي تطل من عيني محمود. وبعدما حضر الضابط وجلس معهما، أشار له أحمد بيه أن يكمل.
أنا قولت دا سيد صاحبي وبيجهز عشان يخض حازم، وقولت كمان تلاقيه قاله هجيب حاجة مثلاً وراح أوضته لبس اللبس اللي هيرعبه بيه، اللي مفهمتوش هو ليه خرج للحوش! لكن كنت في ثانية أخدت قراري وخرجت السكينة اللي كنت مدخلها تحت الحزام واتسحبت بالراحة وفتحت باب الأوضة، وقبل ما اخرج بصيت لقيت الشبح اللي هو سيد داخل الصالة على طراطيف صوابعه، داخل يخض حازم.
– وبعدين. قال محمد بيه وهو يرتشف القهوة بهدوء.
مفيش ثواني يا باشا وصراخ حازم كان جايب آخر الدنيا، وشوية لقيت صوته علي على سيد اللي كان هيموت من الضحك. رحت قافل باب الأوضة وفكرت.. ورحت فاتح الواتس وباعت رسالة لحازم أسأله انت فين. قاللي إنه عند سيد صاحبنا، وقعد يشتم في سيد، وقاللي إنه عمل فيه مقلب وهو لابس لبس مرعب. بس.. دا اللي كنت عايزه. كده أقدر أثبت وأنا حاطط رجل على رجل إن سيد هو اللي قتل حازم قبل ما يقتل نفسه.
– المليجي دا مين؟ دا ولا هو ولا توفيق الدقن ولا حتى عادل أدهم يوصلوا لتفكيرك الشيطاني ده! كمل يا داهية.
اللي معرفتوش بقى إن حازم من خوفه الحقيقي حول الرسالة اللي بعتهالي لواحد صاحبه أنا معرفوش، ودا اللي عرفته بعدين. المهم أنا فتحت الباب والسكينة في أيدي، ولزقت ضهري في الحيطة واتسحبت سِنة سِنة، بصيت في الصالة لقيت حازم بس، قلبي اتقبض، بصيت ورايا بسرعة خفت ليكون سيد ورايا، لكن ملقتش حد. خوفت أدخل على حازم واقتله سيد يكون قريب ويخبطني بأي حاجة، وبعدين سمعت صوت ماية جاي من الحمام، اطمنت، وبشويش اتحركت وجيت من ورا حازم ومسكت بقه بأيد وبالأيد التانية وفي ضهره بالسكينة، مرة واتنين وتلاتة وعشرة لحد ما وقع على الأرض وانا ماسك بقه لحد ما اتأكدت إنه مات.
– وبعدين. قال محمد بيه بنبرة هادئة.
وبعدين طفيت نور الصالة، وبعدها بثواني سمعت صوت باب الحمام بيتفتح، وصوت سيد وهو بيقول: حازم.. حاااازم.. افتح النور بلاش غلاسة.. أنا آسف يا عم افتح النور. لو أنا مكان سيد فعلاً أخاف، لأني من ساعة ما دخلت والبيت كله ضلمة ما عدا الصالة، أنا افتكرت سيد هو اللي قاصد يطفي الأنوار، لكن تقريبًا اللمض كلها بايظة، والنور البسيط اللي كان بيدخل الحمام من الشباك الأزاز خلاص معدش بيدخل من بعد ما طفيت نور الصالة. فخرج سيد بسرعة.. الحمامات بتخوف أصلاً.

من وقت ما خرج من الحمام وهو بينادي على حازم يفتح النور، استنيته لما قرب على الصالة وكنت وقتها واقف جنب الزرار، لإني عارف إنه جاي ناحيته، أنا مش شايفه ولا هو شايفني، بس سامع صوته، ولمّا حسيت إنه واقف أدامي رحت فاتح النور وصارخ في وشه والسكينة مرفوعة في الهوا.
صرخ بصوت عالي وراح زاققني وجاري ناحية الحوش، وقعت على الأرض لأني مش متوقع منه كده، قمت وجبت السكينة اللي وقعت من أيدي وبمنتهى الغل جريت وراه. مكانش ليه أثر، فجأة افتكرت لما كنت بقول لنفسي لو حد حس بيا هستخبى فوق أي شجرة، بصيت على الشجر على النور الضعيف اللي جاي من الصالة، لمحته. وأول ما اتأكد إني شوفته رمى نفسه، رجله وجعته ومقدرش يجري وفضل على الأرض. قربت منه بهدوء، بشوفهم في الأفلام بيموتوا ضحاياهم من الرعب بهدوءهم ده.
بس كمان في الأفلام الضحية بيهرب لما اللي جاي يقتله يفضل يتكلم ويضيع وقت. أنا بقى مضيعتش وقت وضربته بالسكينة ييجي عشرين ضربة.
– وبعدين.
قلعت اللبس والقناع ووريته وشي قبل ما يموت.
– ليه؟
ورميت اللبس في الترعة بعد ما لفيته على حجر عشان يغطس.
– بقولك وريته وشك ليه.
هقولك يا باشا.
المهم روحت البيت ونمت. تاني يوم بفتح الفيس لقيت بوست ممول ظاهرلي لأن صحابي معلقين عليه. البوست بيقول إن سيد صاحبنا قتل حازم وقتل نفسه وكان لابس لبس غريب وقناع مرعب. اه.. نسيت أقولك يا باشا، سيد لما خرج من الحمام كان قالع القناع واللبس ولابس عادي، ومنسيتش وانا بضربه بالسكينة إني أضربه في بطنه وصدره بس، لأني نويت ألبسه القناع واللبس الغريب اللي هو روب أسود مفتوح من أدام، عشان يبقى هو اللي قتل حازم وقتل نفسه.
ارتحت بعد ما قريت البوست، بس بعد ما دخلت أقرأ التعليقات خفت جدًا وارتعبت؛ في راجل معلق وبيقول إنه يعرف سر خطير عن الحادثة دي، دخلت عند الراجل ده وكبرت صورته.. كان هو الراجل صاحب المحل اللي انا وسيد جبنا منه اللبس والقناع.

أيوه.. ومن حسن حظ الراجل إنه كتب التعليق ده بعد ما جالي القسم وقاللي إنه شاف البوست بتاع الحادثة اللي صاحب حازم كاتبه وعامله ترويج ومستهدف فيه من ضمن اللي مستهدفهم، المحلات اللي بتبيع اللبس والأقنعة دي.
صاحب حازم دا اللي حازم كان بعتله نفس رسالة الواتس اللي بعتهالك. ولما عرف إن حازم مات، قال بس يبقى سيد هو اللي قتله، وراح بسرعة ناشر البوست.. ومكناش نعرف واحنا بنحقق معاه في القسم وبنزعقله على البوست إنه هيكون الحاجة اللي هتوصلنا ليك.
أنا يا باشا لو كنت أعرف إن البياع متفق معاكوا مكنتش رحتله المحل.
دا أكيد يا حوده، استخبينا في المحل وبراه، ومتأكدين إنك هتيجي، لأن التعليق اللي كتبه الراجل رد عليه مئات الأشخاص، وانت من ضمنهم. ولمّا راجعنا التعليقات مع البياع، وشاف صورتك عرفك على طول.
خده يا عسكري.

تفتكر يا باشا الواد دا قتل صحابه ليه؟
– والله انا متحير يا محمد بيه زيك وزي الناس، الواد كتوم جدًا وشكله معبي ومش هيقول على دوافعه.. ابن الجنّية مقالش ليه ورا سيد وشه قبل ما سيد يموت.
– يا عسكري.