جراحي يكتب – لو يطول الليل –
لو يطُول الليل أطولك نجم سعدي
لو يزورني النوم أشوفك حلم وردي
لو تجاملنا السنين و تعود بأوقات اللقا
كنت اقولك مدي إيدك للمحبه آدي يدي
صَبرنا ع البعد شيء مستغربه
إزاي بنصبر ع المرار و نجربه
و ازاي مجربناش ترانيم الاشتياق
و موشح العشاق نديم بـنقرَبُه
مجنونة كنتي و كنت أنا عاقل غبي
كنتي عاشقاني انطلاق و انا كنت عاوز أبان نبي
مفهمتش انك موجه، عصفوره بجناح
و العاده عندك تبعدي و تقربي
بس انتي لما قبلتي قلبي يكون فـ قلبك
و فـ ضي شمس المغربيه يدوب فـ نبضك
كنتي ساكته، كنتي ساكنه زي ازهار الربيع
ماغمزتليش انك حواديت ألف ليله و الليله وعدك
مفهمتش إنك نسمة الحرية في الليل ع الحدود
و انا جندي عيـل بهدلوه صفا و انتباه
و رموه في عز الحرب بين عفَـرَه و بارود
و ازاي يزيد عن وطنه اذا كان وطنه تاه
يا نعمه جت م الله، و انا بــشُكر النعم جاهل
و شيخي علمني الوصال، و الوصل مش ساهل
لا عرفت أكون لك كفوف مرفوعة في التسابيح
و ازاي أكون الفرض و انتي الساكنه في نوافل
ساعات الصحرا تعشق سهل بس الارض بتفَرَق
و نني عينين قمر بيْـهِل بس الرمش بيغَـرَق
و رغم اني أنا و انتي حوالنا نعيش مابين الناس
لا صدقنا حكاوي الناس و لا قصتنا تتصدق
جريدة الفكر الحر 