الكاتب محمد جراحي يكتب شوفتي حبي قد إيه


جراحي يكتب (شوفتي حبي قد ايه)

 

.
شوفتي حبي قد ايه
يا حبيبتي ليكي
و عرفتي ايه بيحصل لي
لما بشوف عنيكي
حاسه بيا و دايبه فيا!
و بكياني دوبت فيكي

بس عندي لسه أكتر
لسه عاوز أقول و أعبر
عايز أحبك حبك أكبر
بس خايف م الملام
خايف تقولي كلام و بس
مع اني مش بياع كلام
و بكل حرف انا قلبي حس
و برضه مش قد المقام
لسه فيا جوه مني
شعور حرام يفضل كده
احساس ميوصفهوش كلام
احساس ماليني بالغرام
احساس ميظهرش الا جوه
الحضن ده

حبيت هدوء طبعك
و دوبت ف رقتك
و شقاوة النظره ف عنيكي
و شوق هواكي و ضحكتك
ضحكتك…
آه منها دي اللي مجناني
و زارعه فيا الشوق جناين
شجر غرامي.. ورد حبي.. نيل بيجري..
نيل و انا كاويني العطش
عطش الحبيب لعيون حبيبه
و حضن قلبه
لما يشتاق يلمسه
و يبوس عيونه و هو جمبه

عطشانه روحي و مين
هايسقيني سواكي
بفرح بقربك
و فـ بعادك قلبي باكي
ياريت أقدر
علي الحب اللي فـ عنيكي
ياريتك تقدري عليا
كتير عاندتني أحوالي
و غرست ضفرها فيا
و لـكني، بغني و اكمل
سِكِتي لوحدي
و ماشي طريقي زي الفيل
أدب الدبه في الخطوه
جسد قاسي شديد الحيل
و لما قابلني نور حُسنك
طلع لي جناح كما العصافير
أزقزق و ابقي حواليكي
و اشيلك فوق جناحي و اطير
بحبك
بحبك حب مش ممكن
ألاقي ف دنيتي قده
و باب القلب كان مقفول
عشانك قومت و فتحته
تعالي برجلك المرمر
و خطي العتبه و اتمايلي
و صلي ركعتين فيا
و سمي و كبري تمللي
ده جوه القلب ليكي قصور
تعالي و عيشي جوايا
مفيش بعدك حياه تسوي
ياريت تتنفسي هوايا
يافرحة قلبي علي ايدك
بدأت اتعلم الفرحه
بقالي كتير بعيد عنك
هشوفك امتي بالطرحه

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

هذا الموقع يستخدم خدمة Akismet للتقليل من البريد المزعجة. اعرف المزيد عن كيفية التعامل مع بيانات التعليقات الخاصة بك processed.