جراحي يكتب (مع القمره)

قاعد مع القمره اللي طالّه و فاتحه شباك السما و مدلدله ضفايرها نور
ساند دماغي لــ حِجر نخله محمله طَـرْح الهويٰ بلح الشفايف و الخدود
نفسي ابوسك يا حبيبتي و انسى في البوسة الوجود، نفسي أدُوب
نفسي أدَوِِب فيَّ روحك .. زي ما بـدوب العسل ع القشطة دُوب
بس فين و ازاي اطولك .. أو قوليلي إمتى أطُول !
و أنت حلم
و آه من الأحلام
بتيجي كل يوم لكن ، مبتطوِلش، مابتشبعش !!
بس مفيش في إيد قلبي سوا يحلم
لعل ف يوم
أقوم م النوم
ألاقي دفاكي بِتـكَلم
و تشرق نظرتك فوقي و تحت جناحك أتقلب
تميلي بوجنتك فوقي و تحكيلي و لا اتململ
جمالك
يا أم قلب أبيض
بيديني أمل يمكن يكون كداب …
و حتى إن كان أمل كداب
أنا مبسوط و هاستحمل
و عمري ف يوم ما أبطل حلم و هكمل
و عمري ف يوم ما أدق الباب

بحبك قد كل الحب في الدنيا و في الآخره و في الأحلام
بحبك قد نيل بلدي من المنبع إلى الشلال
و من وادي الجنوب الأسمر لحد البحر و رماله
بحبك قد ما يحب الجنين أمه، و صدر أمه، و حضن أمه
و مهما تكون أساوة امُـه … بتحلاله
بحبك حتى و أنت بعيد و علشانك
أدوق البعد و الترحال
أسيب الناس و أكون ليكي
يموت أسمي ما بين الناس
و اعيش فيكي
يجافيني الخلايق لأجل اسيبك يوم ..!
أسيب كل البشر تِمـاً ، و علشانك حياتي تهون
ألف كياني في هدية
و يوم القُرب أجيبهولك
أكون لك عقد ف رقبتك
يزِين صدرك
و أكون لك توب
يداري عن العيون سحرك يا صوت الناي
أنا عشقتك
عشقتك موت و مش عارف
عشقت إزاي.