الكاتب محمد جراحي يكتب – يا معلمة –

جراحي يكتب – يا معلمة –

يا معلمة قلبي يدوب
في الحب من غير معلقة
يا معلمة عيني تتوب
عن أي واحدة مزوَقة
يا معلماني إزاي يكون الصبر ع المحبوب
إقبلي مني غرامي
و إلبسيه يا حبيبتي توب

ضمي ليكي جسم ديساه السنين
و قلب يحلم
يلقي وياكي المحبة و الحنين
ماتسيبيش نفسك
لصوت المجروحين في الحب
دول ناس غيرانين
و تعالي جمبي
قوي قلبي
اللي عاش جمبك سعيد
اعرفيني و اعرفي سر الحياة
لما عينك جوه عيني
تلقي محبوبها اللي تاه
سيبي روحك تسري فيا
و انسي ويايا الكلام

إيه لزومه
لما نبقي في المحبة جمب بعض
و بإيه يفيد الصوت و غنوتنا شالتنا
فوق مجال الأرض

يا معلمة الشمس أما تطلع
تستلف م النني نور
يا معلمة الليل أما يرجع
يمضي للعشاق حضور
يا معلمة الغصن المزهر
يطرح الرمان نجوم
علميني أبقي كوكب
و فـ مجال العشق أدُور