جراحي يكتب – ما أجمل الدوبان-
حبيبتي أجمل من جميع الخلق مِن عُـرْب و عَجَـم
لون شعرها و جمال عينيها يحركوا القلب الصنم
صوتها القمر
زارع غُنـا فـ ليل السُكات
يشرح صدور العاشقين
ينسوا فـ رحابه اللي، فات
روحي فيها و مش هاخبي
دي اللي جوه فـ قلبي عيد
شوفتها و عرفت إني
هبقي طيب من جديد
أصل قبل ما كنت أشوفها
كنت واحد قلبه مات
و اما دقت بابتسامه باب عيوني
قلبي سلم من سكات
يا ورد يا مفتح فوق الخدود
بوس لي اوي خدودها
يا طرح رمان جسمها
نفسي في عنقودها
دوقني شهدك يا دلالها
نسيني نار مُـري
ازرعني فيها يا ضحكها
و اطرحني علي عودها
وقف معاكي الزمن
لا كبرت و لا باصغر
انا عشت قبلك حجر
و ساعات كده اتمسخر
بس اما شوفتك وطن
حطيت انا رحالي
و مهما عدي الزمن
لا ارحل و لا اتغير
انتي اللي فيا ضلوع
يا اجمل الارواح
ما تسرسبيني دموع
تنزل مع الأفراح
اشتقت ابوس خدك
و اتخبي فـ ضلوعك
و اسمع غُنـا قلبك
و انام عليه و ارتاح
روحك تحييني
نَفَسِك يداويني
ريحتك تدوبني ما أجمل الدوبان
ليكي انا و شوقي
يا ساريه فـ عروقي
دوخي و لا تفوقي
مين عاوز الفوقان !!
جريدة الفكر الحر 
الفنان والمبدع كالعادة استمر يا صديقى
إعجابإعجاب
ماشاءالله عليك يااشاعر الإحساس والكلمه دايما مبدع
إعجابإعجاب
❤🌸🌸
إعجابإعجاب