“مبنتشافش”
شعر بالعامية المصرية
عبير مصطفى
وشمس تودع المشوار..
وبتسلم…
وشوق مخنوق ونزف نهار..
بيتألم…
ونسمع أد ما نسمع…
ما نتكلم…
وليه هنقول؟؟…
خسارة الشرح
كفاية قلوبنا تتنفس..
وتتونس بذكرى الجرح..
ما هو الجرح اللي ما بينا..
لولاه يمكن هوانا ما كان…
ولا كنا..
ولولا إن سنين حبي..
سكن فيها عذاب قلبي..
مكنش البعد خدله قرار..
بإن هوانا ميكملش..
كانت أشواقنا هتخونا..
وتخذلنا.. ومتستحملش..
وكنا رجعنا من تاني..
نقول ف الآه وبنعاني
نلف في دايرة مخنوقة ..
ومبتخلصش…
نعيش إحساس بطعم الوهم ..
ينادينا سراب نجري ورا ضله
ومبنوصلش…
وإيه آخرة حكايتنا مع الدنيا..
تعبنا نعيش لناس تانية..
ورغم ده كله….
مبنتشافش.
#عبير مصطفى
جريدة الفكر الحر 
جميل 💙
إعجابإعجاب